Qazaqstanǵa kásibı júk tasymaldaýshy mamandar qajet - Atameken

ASTANA. QazAqparat - Elimizde júk tasymalynyń ulǵaıýmen kásibı júk tasymaldaýshylarǵa degen suranys arta túsedi. «Atameken» UKP kóliktik logıstıka boıynsha qosalqy komıtetiniń tóraǵasy Erhat Isqalıevtiń aıtýynsha, búginde eski mentalıtetti ózgertip, alys jerge taýar tasıtyn kólik júrgizýshilerin daıarlaý jumysyn qolǵa alý qajet, dep habarlaıdy QazAqparat tilshisi.

«Ashyǵyn aıtý kerek, búginde júk tasymaly salasynda jumys isteıin kólik júrgizýshileriniń jartysy - belarýstar, lıtvalyqtar jáne taǵy basqa eldiń azamattary. Olardyń arasynda qazaqstandyqtar az. Nege? Men osy máseleni zerdelep kórdim. Onyń basty sebebi - mentalıtette. Keńester kezinde osy salada ózge elderdiń azamattarynan quralǵan «klondaık» qalyptasty. Sosyn qazaqstandyqtar kólik júrgizýshisin mártebeli mamandyq dep sanamaıdy. Eýropada olaı emes. Árıne, bir ýaqytta kásibı kólik júrgizýshileriniń sanyn arttyrý múmkin emes. Degenmen, osyny iske asyrý qajet. Sebebi Qazaqstan arqyly «Batys Eýropa - Batys Qytaı» sııaqty tranzıttik joldar ótedi. Sonyń arqasynda jumyssyzdyq máselesin sheshýge múmkindik bar», - dedi E.Isqalıev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, jaqynda QR Bilim jáne ǵylym mınıstrliginde ótken keńeste kásipkerler kásibı júk tasymaldaýshylardy daıarlaý máselesin kóterdi. Mınıstr atalǵan máseleni sheshýge múddeli. «Bylaı qarasań, kólik júrgizýshisi kýáligin alý úshin kóp ýaqyt ta, arnaıy bilim de qajet emes. Degenmen, halyqaralyq tasymalmen aınalysatyn kólik júrgizýshisi árbir eldiń zańdary men erejelerin bilýi kerek. Sosyn kólik quralynyń ózi qymbat turady. Bir júk kóliginiń ózi - 180 myń dollar. Oǵan týra sondaı somaǵa júk artylady. Ondaı shyǵyndardy kez kelgen saqtandyrý júıesi kótere bermeıdi. Sondyqtan osy sanattaǵy kólik júrgizýshilerin daıarlaý sharalaryna basa nazar aýdarý qajet», - dep atap kórsetti E.Isqalıev.


Foto: atameken.kz