Qazaqstanǵa qansha jedel járdem kóligi qajet
NUR-SULTAN. QazAqparat – Qazaqstanda úsh myńǵa jýyq jańa jedel járdem kóligi qajet. Bul týraly «Báıterek» UBH» AQ Basqarýshy dırektory Ersaıyn Hamıtov málim etti, dep habarlaıdy QazAqparat tilshisi.
Búgin Parlamenti Senatynda respýblıkalyq bıýdjetke qatysty zań jobasynyń tanystyrylymynda senator Mıhaıl Bortnık elimizde jedel járdem jáne órt sóndirý kólikterin shyǵarý boıynsha qandaı qadamdar qarastyrylǵanyn surady.
«Arnaıy avtokólikterdi qansha satyp alsaq ta, keıinnen olardy 3-4 jylda jańartý qajettigi týandaıtyny anyq», - dedi M. Bortnık.
Óz kezeginde Ersaıyn Hamıtov avtokólikter otandyq óndiristerde qurastyrylatynyn «Hyundai» markaly avtomobılder ekenin jetkizdi.
«Lızıngtik qarjylandyrýǵa toqtalsaq, jyldyq jeti paıyz stavkamen 5-7 jylǵa bólinedi. 2019- 2020 jyldary 818 jedel járdem kóligin jańartýdy josparlap otyrmyz. Jalpy qajettilik 3 000 jýyq», - dedi E. Hamıtov.
QR Ulttyq ekonomıka vıtse-mınıstri Mádı Takıevtiń aıtýynsha, el óńirlerin jedel járdem kólikterimen qamtamasyz etý baǵytynda Indýstrııa jáne ınfraqurylymdyq damý jáne Densaýlyq saqtaý mınıstrlikteri arasynda tıisti Jol kartasy bekitildi.
«Jańa áriptesim aıtqandaı, úsh myńǵa jýyq avtokólik qajet. Qazirgi kezde bul kólikter qurastyrylýda», - dedi vıtse-mınıstr.
