Qazaqstanǵa qandaı taýarlar kóp ımporttalady

NUR-SULTAN. QazAqparat – Qazaqstan ımportynyń negizgi bóligi mashına qural-jabdyqtaryna tıesili, dep habarlaıdy QazAqparat tilshisi.

Bul týraly QR Ulttyq ekonomıka mınıstrliginiń makroekonomıkalyq taldaý jáne boljamdaý departamentiniń dırektory Asqar Japarqulov ortalyq kommýnıkatsııalar qyzmetinde ótken brıfıngte málim etti.

Mınıstrlik ókiliniń aıtýynsha, jarty jyldyń ishinde eskport kólemi 23,6 mlrd dollardy quraǵan.

«Eksporttyń ósýine farmatsevtıfka ónimderiniń kóptep satylýy áser etip otyr. Mundaǵy ósim 3,5 ese bolsa, qorǵasyn men maqta eskporty 2 esege artqan. Mys pen myrysh eksporty da byltyrǵy kezeńnen joǵary. Aýyl sharýashylyǵynda et eksporty artyp keledi. Jyl basynan beri 8000 tonna et satylǵan», - dedi maman.

Departament dırektory el ekonomıkasyndaǵy ımporttyń jaı-kúıine de toqtaldy.

«Importta da ósim bar. Alǵashqy 5 aıda onyń ósim kólemi 8,4 paıyzǵa jetti. Bul ınvestıtsııalyq baǵdarlamalarmen tikeleı baılanysty. Óıtkeni, ındýstrııalandyrý jobalary bizden tehnologııalar men qural-jabdyqtardyń ımportyn talap etedi. Mysaly, biz kez kelgen basqa taýarǵa qaraǵanda mashına qondyrǵylaryn óte kóp satyp alamyz», - dedi ol.

Aıta ketsek, atalmysh brıfıngte Asqar Japarqulov áleýmettik tólemderdiń artýy eldegi jalpy ishki ónimniń kólemine qalaı áser etip jatqanyn aıtqan bolatyn.