Qazaqstanǵa Izraıl Premer-Mınıstri saparlaıdy
ASTANA. QazAqparat - Aǵymdaǵy jyldyń jeltoqsan aıynyń ortasynda Izraıl Premer-Mınıstri Bınıamın Netanıahý Qazaqstanǵa saparmen keledi. Bul jaıynda búgin Qazaqstan-Izraıl saýda-ekonomıkalyq yntymaqtastyǵy jónindegi 7-shi otyrys barysynda belgili boldy, dep habarlaıdy QazAqparat.
«Búgin biz Qazaqstan Respýblıkasy men Izraıl memleketi arasyndaǵy úkimetaralyq komıssııanyń 7-shi otyrysyn ótkizip jatyrmyz. Bul - Izraıl Premer-Mınıstri B.Netanıahýdyń elimizge josparlanǵan sapary aldyndaǵy mańyzdy kezdesý. Sapar osy jyldyń jeltoqsan aıynyń ortasyna josparlanǵan. Biz búgin elderimiz arasyndaǵy tıimdi yntymaqtastyqtyń birqatar baǵyttaryn talqyladyq. Naqty birqatar kelisimge qol qoıylady jáne ózge de qosymsha sheshimder qarastyrylyp jatyr. Ol qujattar saýda-ekonomıkalyq, ınvestıtsııalyq jáne túrli salalardaǵy bizdiń elderimizdiń yntymaqtastyǵyn kózdeıdi. Árıne, agroónerkásip keshenin damytý, sý resýstary, ınnovatsııa salalaryndaǵy yntymaqtastyq ózge de baǵyttarǵa tyń serpin beretindigi sózsiz», - dedi komıssııa otyrysy aıasynda BAQ ókilderine suhbat bergen Qarjy mınıstri Baqyt Sultanov.
Munan bólek mınıstrdiń atap ótýinshe, taraptar mádenı-gýmanıtarlyq yntymaqtastyq máselelerin de qarastyrdy.
«Úkimetaralyq komıssııa otyrysynda kóterilgen taǵy bir ózekti másele bizdiń elderimizdiń astanalary arasynda tikeleı áýe reısin ashý boldy. Qazaqstan óz tarabynan EKSPO kórmesine daıyndyq aıasynda kelesi jyly mundaı áýe reısteriniń oryndalýyna kedergi keltiretin barlyq tosqaýyldardy alyp tastaýdy josparlaýda», - dedi ol.
Sonymen qatar mınıstr eki eldiń iskerlik toptarynyń tikeleı baılanysyn jandandyrýǵa barlyq jaǵdaı jasaý úshin naqty jumystardyń qolǵa alynatyndyǵyn atap ótti.
«Bul rette Qazaqstan taraby iskerlik keńestiń qurylýyna bastamashylyq jasady. Atalǵan shara eki eldiń yntymaqtastyǵyna tyń serpin beredi dep senemiz», - dedi Baqyt Sultanov.
Komıssııa otyrysyna Izraıl Qorshaǵan ortany qorǵaý jáne Ierýsalım men dıaspora isteri jónindegi mınıstri Zeev Elkın bastaǵan delegatsııa qatysýda.
Aıta keteıik, aǵymdaǵy jyldyń 9 aıynda Qazaqstannyń Izraılmen taýar aınalymy 236,9 mln dollarǵa jetti. Onyń ishinde eksport 196,9 mln, ımport 40 mln dollarǵa teń. Bul ótken jyldyń sáıkes kezeńi kórsetkishterimen salystyrǵanda 1,3 paıyzǵa az. Osyǵan baılanysty taraptar Eýrazııalyq ekonomıkalyq odaq pen onyń múshe memleketteri jáne Izraıl arasyndaǵy erkin saýda aımaǵy týraly kelisim jasasý boıynsha kelissózderdi bastaýdyń mańyzdylyǵyn aıtýda.
