Qazaqstanǵa irimshik shyǵaratyn 40-tan astam kásiporyn qajet - Myrzaxmetov
ASTANA. QazAqparat - Elimizde sút óńdeý kólemin barynsha arttyrý josparlanyp otyr. Ol úshin eski kásiporyndardy jańartyp, ondaǵan shaǵyn tsextardy jańadan ashý qajet, dep xabarlaıdy QazAqparat tilshisi.
"Qazirgi kezde respýblıka boıynsha 148 sút óńdeý kásiporny bar. Sonyń 41-in jańartý qajet. Onyń ústine aldaǵy ýaqytta 42 shaǵyn kásiporyndy jańadan salý kerek", - dedi Aýyl sharýashylyǵy mınıstri Asqar Myrzaxmetov Úkimettiń búgingi otyrysynda.
Onyń aıtýynsha, búginde barlyq kásiporyndar súttiń 1,8 mln tonnasyn óńdeı alýǵa qaýqarly. Alaıda onyń tek 1,1 mln tonnasy (60 paıyzy) ǵana óńdeledi. Aldaǵy ýaqytta atalǵan kórsetkishti 80 paıyzǵa, ıaǵnı 1,6 mln tonnaǵa deıin jetkizý jospary bar. Osynyń arqasynda otandyq sút ónimderiniń jalpy kólemin 49 paıyzǵa arttyrýǵa bolady. Sonda shetelden keletin sary irimshik 70 paıyzdan 51 paıyzǵa, sary maı 37 paıyzdan 17 paıyzǵa, aq irimshiktiń mólsheri 35 paıyzdan 23 paıyzǵa deıin tómendeıdi", - dep atap kórsetti Myrzaxmetov.
Mınıstrliktiń josparyna sáıkes, sút óńdeý salasyndaǵy jańa kásiporyndar Ońtústik Qazaqstan, Almaty, Pavlodar, Batys Qazaqstan men Aqtóbe oblystarynda salý josparlanǵan. Sebebi atalǵan aımaqtarda shıkizattyń mol qory bar.
Aıta keteıik, sút óńdeý salasy osy saladaǵy kásiporyndardy damytýdyń kartasyna endi . Premer-Mınıstr Baqytjan Saǵyntaev ónim óńdeý salasyndaǵy kásiporyndardy memlekettik qoldaý kartasyn iske asyrýǵa tapsyrma berdi. Atalǵan qujattyń aıasynda jeńildetilgen nesıeler beriledi.
