Qazaqstanǵa ınternet-alaıaqtyq jasaý maqsatynda kelgen sheteldik tutqyndaldy

ASTANA. KAZINFORM — Qostanaıda ınternet-alaıaqtyqqa qatysy bar sheteldik azamat tutqyndaldy, dep habarlaıdy Polisia.kz.

Qostanaı oblysynda polıtsııa qyzmetkerleri Ulttyq qaýipsizdik komıteti departamentimen jáne oblystyq prokýratýramen birlese otyryp, sım-bokstardyń zańsyz qyzmetiniń jolyn kesý boıynsha arnaıy operatsııa ótkizdi.

Rýdnyı qalasynda júrgizilgen jedel is-sharalar barysynda kórshi memlekettiń azamaty ustaldy. Tekserý nátıjesinde onyń Qazaqstanǵa alaıaqtyq áreketter jasaý maqsatynda arnaıy kelgeni anyqtaldy.

Jedel ýákilder kúdiktiniń jalǵa alǵan páterin tintý barysynda qylmystyq áreketterdi júzege asyrýǵa arnalǵan qural-jabdyqtardy tapty. Onyń ishinde vırtýaldy abonenttik nómirlerdi tirkeýge paıdalanylǵan SIM-boks qurylǵysy, ınternet-marshrýtızator, eki IMEI kody bar uıaly telefon, qazaqstandyq uıaly operatorlardyń 1200-den astam SIM-kartasy, segiz banktik karta jáne avıabıletter tárkilendi.

Kúdikti SIM-boksty basqarý úshin Telegram messendjeri arqyly belgisiz "kýratorlardan" nusqaýlar alyp otyrǵan. Ol osy áreketteri úshin kún saıyn 200 AQSh dollary kóleminde syıaqy alǵan.

Qazirgi tańda bul fakti boıynsha sotqa deıingi tergeý amaldary júrgizilýde. Ustalǵan azamat Rýdnyı qalasy polıtsııa basqarmasynyń ýaqytsha ustaý ızolıatoryna qamaldy. Eger onyń kinási dáleldense, Qazaqstan Respýblıkasynyń zańnamasyna sáıkes eki jylǵa deıin bas bostandyǵynan aıyrylýy múmkin.

Buǵan deıin ınternet alaıaqtaryna aldanǵandardyń aqshasyn alyp, ózgelerge aýdarǵan aqtóbelik ustalǵan.