Qazaqstanǵa ımporttalatyn et tekserilmeıdi dep kim aıtty - Myrzahmetov
Onyń aıtýynsha, búginde etti ımporttaýdyń naqty erejeleri bar, dep xabarlaıdy QazAqparat tilshisi Úkimet úıinen.
Mınıstrdiń sózine qaraǵanda, Esep komıteti jarııalaǵan faktilerge Veterınarlyq baqylaý komıtetiniń basshysy Saqtash Hasenovtyń qatysy joq. "Hasenovtyń ózi tikeleı zań buzýshylyqqa baryp otyr. Onyń jalpy júıege eshqandaı qatysy joq. Óıtkeni erejede tekseristerdiń (etti tekserý sharalary - avt.) bári qarastyrylǵan", - dedi A.Myrzaxmetov QazAqparat tilshisine bergen suxbatynda.
"Demek, Qazaqstanǵa ımporttalatyn ettiń bári tekseriledi ǵoı?" degen suraqqa mınıstr: "Árıne, tekseriledi. Tekserilmese bolmaıdy ǵoı. Ol - bir. Ekinshiden, bizdiń erejemizge sáıkes, etti elimizge ákelerdiń aldynda onyń sol jaqtan da tekserilgendigi týraly qujaty bolýy tıis. Sondaı kýálikti bergennen keıin baryp, biz óz ruqsatymyzdy beremiz", - dep jaýap berdi.
Aıta keteıik, jaqynda QR Respýblıkalyq bıýdjettiń atqarylýyn baqylaý jónindegi Esep komıtetiniń músheleri shekaranyń arǵy jaǵynan keletin ettiń arnaıy tekseristen ótpeı jatqanyn anyqtady. "Shynymdy aıtsam, biz barlyq ımporttyq ónimder tekserilip turady dep oıladyq. Sóıtsek, ol ónimniń tek 5-6 paıyzy ǵana tekseriledi eken. Demek, qalǵan 94 paıyzy eshbir tekserissiz keledi. Bizde naqty statıstıka da bar. 2014 jyly qoı etiniń bir ǵana partııasy tekserildi. Sondaı-aq balyqtyń jeti partııasy, shoshqa etiniń toǵyz partııasy jáne qus etiniń tek otyz eki partııasy ǵana tekseristen ótken. 2015 jylda qoı etin múldem teksergen joq. Shoshqa etiniń úsh partııasy tekserildi. Boldy. Osy oraıda biz azyq-túlik qaýipsizdigi bar dep aıta alamyz ba?", - dedi Komıtet tóraǵasy Qozy-Kórpesh Jańbyrshın.