Qazaqstanǵa halyqaralyq saýda boıynsha kásibı mamandar qajet - mınıstr J.Aıtjanova
ASTANA. 29 qazan. QazAqparat - Dúnıejúzi saýda uıymyna kirgennen keıin Qazaqstanǵa halyqaralyq saýda salasyndaǵy kásibı mamandar qajet bolady. Úkimettiń búgingi otyrysynda QR Ekonomıkalyq ıntegratsııa isteri mınıstri Janar Aıtjanova osy máseleni kóterdi.
Mınıstr atap kórsetkendeı, qazirdiń ózinde Kedendik odaq pen Eýrazııalyq ekonomıkalyq keńistik aıasynda ondaı mamandar aýadaı qajet. Al Dúnıejúzi saýda uıymyna kirgennen keıin olarǵa degen suranys eki ese artady. Onyń sózine qaraǵanda, búginde halyqaralyq saýda salasyndaǵy mamandardy daıarlaý boıynsha Nazarbaev ýnıversıtetimen tıisti kelisim bar. Alaıda ol is júzinde áli iske asqan joq. «Biz bolsaq, óz tarapymyzdan barynsha kómek berýge daıarmyz. Máselen, ekonomıka mınıstrligi janynda saýda saıasatyn damytý ortalyǵy bar. Sonyń negizinde san-alýan bilim berý sharalaryn ótkizýge bolady», - dedi J.Aıtjanova.
