Qazaqstanǵa Halyqaralyq paralımpıada komıtetiniń prezıdenti keldi
ASTANA. QazAqparat - Búgin Astanaǵa alǵash ret halyqaralyq paralımpıada komıtetiniń prezıdenti Endrıý Parsons resmı saparmen keldi, dep habarlaıdy QazAqparat tilshisi.
Halyqaralyq komıtet basshysy aldymen Astanadaǵy zamanaýı paralımpıadalyq jattyǵý ortalyǵynyń jumysymen tanysty. Odan soń, qurmetti qonaq pen QR Ulttyq paralımpıada komıtetiniń prezıdenti Qaırat Boranbaevtyń qatysýymen baspasóz máslıhaty ótti.
Sondaı-aq, atalǵan kezdesýge otandyq belgili Zúlfııa Ǵabıdýllına, Aleksandr Kolıadın sekildi parasportshylar qatysty.
«Meniń Qazaqstanǵa alǵash ret kelýim, osy rette alǵan áserim ol bólek áńgime. Al búgingi taqyryp parasportqa arnalǵandyqtan onyń sizderde bar ekenine kózim jetti. Qazaqstandaǵy parasport damýynyń nátıjesi, halyqaralyq paralımpıadadaǵy jetistikterden bilýge bolady. Sondaı-aq, halyqaralyq standartqa saı paralımpıadalyq ortalyqtaryńyz bar. Biz óz tarapymyzdan Qazaqstannyń paralımpıadalyq ulttyq komıtetimen birlesip jumys isteýge ázirmiz. Sonyń bir dáleli osy jazda Astanada para paýerlıftıngten ótetin álem chempıonaty», - dedi Endrıý Parsons.
Óz kezeginde elimizdiń Ulttyq paralımpıada komıtetiniń prezıdenti Qaırat Boranbaev qurmetti qonaqqa alǵysyn bildire otyryp, kezdesýdiń Qazaqstanda parasporttyń odan ári damýyna úles qosatynyn aıtyp ótti.
«Parsons myrzanyń kelýdegi negizgi maqsaty, bizdegi parasporttyń damýy deńgeıi jáne ol úshin jasalǵan múmkindiktermen tanysý. Eki kúndik sapar aıasynda parasport taqyrybyna arnalǵan birqatar mańyzdy kezdesýler josparlanýda. Jalpy atalǵan halyqaralyq komıtetpen biz tyǵyz baılanystamyz. Onyń dáleli sońǵy 3 jylda ulttyq komıtet halyqaralyq komıtettiń paralımpıadaǵa arnalǵan birneshe jobalyq grantyn utyp, ony óz elimizde júzege asyryp kelemiz», - dedi ol.
Erteń halyqaralyq paralımpıada komıtetiniń prezıdenti Endrıý Parsonstyń Úkimet basshysy Baqytjan Saǵyntaevpen kezdesýi josparlanýda. Onda komıtet basshysy Qazaqstannyń sońǵy jyldardaǵy halyqaralyq arenada qol jetkizgen jetistikteri men elimizde paralımpıadany odan ári ilgeriletý máselesi sóz bolady dep kútilýde.
Aıta ketsek, halyqaralyq paralımpıada komıteti álemdik deńgeıdegi barlyq parasporttyq sharalardy ótkizý men basqarýǵa jaýapty. Atalǵan uıymnyń quramyna álemniń 180 ulttyq paralımpıadalyq komıteti kiredi, onyń ishinde bizdiń ulttyq paralımpıadalyq komıtette bar.
