Qazaqstanǵa Germanııadan asyl tuqymdy buqalar ákelindi
ASTANA. Tamyzdyń 27-si. QazAqparat - QR Aýyl sharýashylyǵy mınıstrliginiń Mal sharýashylyǵyndaǵy asyl tuqymdar jónindegi «Asyl túlik» respýblıkalyq ortalyǵy Germanııadan tuqymy jaǵynan asyl bolyp baǵalanyp otyrǵan jeti buqany alyp keldi, dep habarlaıdy QR AShM baspasóz qyzmeti.
Eýropadan kelgen avtokerýen Astanaǵa jaqyn ornalasqan Qosshy poselkesiniń asyl tuqymdy mal ortalyǵynyń óndiris bazasyna kelip jetti.
«Bul sharanyń negizgi maqsaty - «Mal sharýashylyǵyndaǵy keń kólemdi selektsııa» baǵdarlamasyn júzege asyrýǵa qatysatyn jańa taýarly-sút fermalardyń shetel selektsııasy tuqymynyń qunyn azaıtý», - dep habarlaıdy baspasóz qyzmeti.
Qazaqstannyń buqalardyń uryǵyna jalpy jyl boıylyq suranysy 700-800 myń dozaǵa baǵalanady. Dıstrıbıýtorlyq ortalyqtar satyp alǵan aýqymdardy eseptegende, rynoktyń eleýli bóligin (82%) «Asyl túlik» ónimi qamtamasyz etip otyr. Uryqtyq ónimniń 70 paıyzdan astamy otandyq selektsııanyń óndirýshi buqalarynan alynyp otyr.
Jalpy alǵanda, «Asyl Túliktegi» mal tuqymy kólemi jaǵynan da, sapasy jaǵynan da qazirgi suranys deńgeıin qanaǵattandyrady.
Baspasóz qyzmeti atap ótkendeı, buqa ósirýshilerdi irikteý barysynda selektsıonerler tarapynan et ónimdilik deńgeıi men Qazaqstanda bar sapaly sıyr jáne buzaý maldarynyń jynys quramy eskerildi.
Sonymen qatar buqa ákelýshiler Eýropadaǵy buqa ósirýshilerdiń kóshbasshysy bolyp tabylady, halyqaralyq norma negizinde mal tuqymynyń sapasy boıynsha baǵalanýdan ótkendigi týraly sertıfıkatqa ıe. Qazirgi tańda buqalar karantınde tur.
