Qazaqstanǵa Germanııadan 86 mlrd teńgeniń alaıaqtyǵyna qatysy bar kúdikti jetkizildi
Qylmystyq toptyń quramynda oıyn bıznesi salasynda qylmys jasady degen kúdikti Germanııadan ekstradıtsııalandy, dep habarlaıdy QR Bas prokýratýrasynyń baspasóz qyzmeti.
Búgin Bas prokýratýra men Qarjylyq monıtorıng agenttiginiń qyzmetkerleri Qazaqstan Respýblıkasynyń Syrtqy ister mınıstrligi jáne Interpoldyń kómegimen Germanııa Federatıvtik Respýblıkasynan «OLIMP.KZ býkmekerlik keńseniń» qyzmetine baılanysty qylmystyq topqa qatysqany úshin qylmystyq jaýaptylyqqa tartý maqsatynda Qazaqstannyń azamatshasy D-ny ekstradıtsııalady.
Ol 2014-2019 jyldary qylmystyq toptyń quramynda zańsyz qumar oıyndardy ótkizýge, salyq tóleýden jáne bıýdjetke tólenetin basqa da mindetti tólemderden jaltarýǵa, sondaı-aq qylmystyq jolmen alynǵan aqsha men múlikti zańdastyrýǵa qatysqany úshin kúdikke ilindi.
Atalǵan quqyqqa qaıshy árekettiń nátıjesinde memleketke 86,7 mıllıard teńgeden astam shyǵyn keltirildi.
Osyǵan baılanysty oǵan qatysty sotqa deıingi tergep-tekserý bastaldy jáne oǵan halyqaralyq izdeý jarııalandy.
Aǵymdaǵy jyldyń mamyr aıynda ol Germanııa aýmaǵynda ustaldy.
Qazirgi ýaqytta kúdikti Astana qalasynyń tergeý ızolıatoryna qamaqqa alyndy.
Aıyp taǵylǵan qylmystardy jasaǵany úshin múlkin tárkileý, 3 jyldan 10 jylǵa deıingi merzimge bas bostandyǵynan aıyrý jazasy kózdelgen.
Іzdeýde júrgen adamdy ekstradıtsııalaý germandyq quzyretti organdarmen tyǵyz yntymaqtastyqtyń arqasynda múmkin boldy.
Budan basqa, Germanııamen ustap berý týraly sharttyń bolmaýyna qaramastan, aǵymdaǵy jyly osy elden Qazaqstanǵa adam óltirý jáne esirtki saýdasy boıynsha kúdikti taǵy 2 adam ekstradıtsııalandy.
Óz kezeginde, Germanııa tarapyna qorqytyp alý jáne zorlaý qylmystaryn jasaǵany úshin izdeýde júrgen 2 adam ustap berildi.
