Elimizge Eýropadan taǵy segiz Prjevalskıı jylqysy ákelinedi
ASTANA. KAZINFORM — Keler aptada Qostanaı dalasyna halyqaralyq baǵdarlama aıasynda taǵy segiz kerqulan jetkiziledi.
Praga men Berlın qalalarynan tasymaldanatyn janýarlar Qazaqstandaǵy sırek kezdesetin jabaıy jylqy túriniń popýlıatsııasyn qalpyna keltirýge áser etpek.
Qazaqstan bıoalýantúrlilikti saqtaý qaýymdastyǵynyń atqarýshy dırektory Vera Voronovanyń aıtýynsha, bıyl elge segiz kerqulan jetkiziledi: olardyń tórteýi — Pragadan ákelinetin aıǵyrlar, al taǵy tórteýi — Berlınnen jetkiziletin bıeler.
Eki elden jetkiziletin kerqulandar bólek-bólek tasmaldanady. Aldymen 1 maýsym kúni tańerteń Chehııa armııasynyń CASA ushaǵymen Praga haıýanattar baǵynan tórt aıǵyr jetkiziledi. Olar Qostanaı áýejaıyna tańǵy saǵat 07:00–de ákelinip, keıin 550 shaqyrymdaǵy dalalyq reıntrodýktsııa ortalyǵyna tasymaldanady. Al Berlındegi Tierpark-ten jetkiziletin tórt bıeni 5 maýsymda ákelý josparlanǵan.
Ótken jyly Qazaqstanǵa ákelingen kerqulandar tabıǵı ortaǵa beıimdelip jatyr.
— Qazir ótken jyly jetkizilgen jylqylardy «Altyn Dala» memlekettik tabıǵı rezervaty aýmaǵyna jiberýge daıyndyq júrgizilip jatyr. Al keıbir bıe qorshaýda qalyp, jańadan qosylatyn aıǵyrlarmen birge ustalady, — dedi Vera Voronova.
Kerqulandardy tarıhı mekenine qaıtarý bastamasy memleketaralyq kelisim aıasynda júzege asyp keledi. Qazir jobaǵa Praga haıýanattar baǵy, Qazaqstan bıoalýantúrlilikti saqtaý qaýymdastyǵy, QR Orman sharýashylyǵy jáne janýarlar dúnıesi komıteti, Berlındegi Tierpark, Frankfýrt zoologııalyq qoǵamy jáne Chehııa Áýe kúshteri atsalysyp otyr. Baǵdarlamanyń basty maqsaty — sırek kezdesetin janýarlardyń tabıǵı ortadaǵy turaqty popýlıatsııasyn qalypqa keltirý.
Qazaqstanda kerqulandardy qaıta jersindirý jobasy sátti bastaldy. 2024 jylǵy maýsymda alǵashqy jylqylar ákelinse, 2025 jylǵy maýsymda ekinshi top jetkizilgen bolatyn.
Buǵan deıin kerqulandardyń tarıhı mekenine beıimdelý barysy týraly jazǵan edik.
