Qazaqstanǵa Eýropadan da, AQSh-tan da sanktsııa týraly resmı habarlama túsken joq - SІM
«Batys basylymdary Reseıge satýǵa sanktsııa salynǵan gadjet, mıkrochıp sııaqty taýarlardyń Qazaqstan arqyly tasymaldanýy kúrt kóbeıgenin aıtyp otyr. Bul basylymdar «Qazaqstan Reseıge sanktsııalardy aınalyp ótýge kómektesip jatqan joq pa?», - dep surady jýrnalıst.
Aıbek Smadııarovtyń aıtýynsha, resmı organdardan ondaı habarlama kelmegen.
«Qazaqstan men AQSh arasynda arnaıy komıssııa bar, Saýda mınıstrligi júrgizedi. Eger bir qazaqstandyq kompanııa Reseıdiń bir kompanııasymen kelissóz ótkizip nemese kelisimshartqa qol qoıý josparlanyp jatsa, sol komıssııa aldyn ala aqparat beredi. «Bul kelisimshartqa qol qoıýdyń qajeti joq, óıtkeni sanktsııaǵa ushyraısyzdar», - dep aldyn ala málimet beredi. Sondyqtan, qazirgi tańda Qazaqstannyń bir de bir kompanııasy sanktsııaǵa ushyraǵan joq. Óıtkeni biz bul másele boıynsha tııanaqty jumys júrgizip kele jatyrmyz», - dedi ol.
Sondaı-aq SІM resmı ókili atalǵan málimetter tekseriletinin atap ótti.
«Endi basylymdardyń málimetin, árıne, biz batys áriptesterimizben birge tekseremiz. Qazirgi tańda ne Eýropadan, ne AQSh-tan resmı túrde qandaı da bir ondaı habarlama túsken joq», - dedi Aıbek Smadııarov.
