Qazaqstanǵa et ımportynyń kórsetkishteri ulǵaıyp otyr

ASTANA. 2 sáýir. QazAqparat - Aǵymdaǵy jyldyń qańtar-aqpan aılarynda Qazaqstan Ýkraınadan 6,7 mln. dollarǵa 3,7 myń tonna et pen jańa soıylǵan mal etinen jasalǵan, qatyrylǵan jáne salqyndatylǵan sýbónimder ımporttady. Bul kórsetkish 2012 jyldyń sáıkes kezeńimen salystyrǵanda kólemi boıynsha 7,5 ese, baǵa kórsetkishi boıynsha 4,4 esege artyq. Bul týraly Qarjy mınıstrliginiń Kedendik baqylaý komıtetiniń habarlamasynda aıtylady.

Budan bólek, málimetterge qaraǵanda, Keden odaǵy elderin esepke almaǵanda, jalpy, Qazaqstan 15,1 mln. dollar bolatyn (+10,1%) somaǵa 7,9 myń tonna (+42,4%) et ımporttap otyr. Qazaqstanǵa et pen et ónimderin jetkizgen memleketter qatarynda AQSh, Paragvaı, Polsha, Belgııa, Aýstralııa, Aýstrııa, Argentına, Bolgarııa, Brazılııa, Kanada, Qytaı, Meksıka, Monǵolııa, Nıderlandy, Jańa Zelandııa, Ýrýgvaı elderi de bar.