Qazaqstanǵa eshqandaı qysym jasalyp jatqan joq – Bozymbaev ushaq apatyn tergeýge qatysty

ASTANA. KAZINFORM - Premer-mınıstrdiń orynbasary, Úkimettik komıssııanyń jetekshisi Qanat Bozymbaev Tengrinews.kz tilshisine bergen suhbatynda Qazaqstanǵa Aqtaý mańyndaǵy ushaq apatyn tekserý máselesinde «syrttan qysym jasalyp jatyr» degen aqparatqa túsinikteme berdi.

– Bul jalǵan aqparat ekenin birden aıtamyn. Bul apattyń mán-jaıyn anyqtaýǵa eshbir elden eshkim aralasýǵa tyrysyp jatqan joq. Biz bul jerde eshqandaı qıyndyq kórip turǵan joqpyz, – dedi Qanat Bozymbaev.

Onyń aıtýynsha, Qazaqstan ushaq apatyn tergeýge múddeli barlyq eldiń keńinen qatysýyn qamtamasyz etti.

– Bul eń aldymen úsh memleket: Ázerbaıjan Respýblıkasy, Reseı Federatsııasy jáne óndirýshi el Brazılııa. Olardyń barlyq ókili,  17 adam qazirdiń ózinde jumys istep jatyr. Eshkimge qandaı da bir sebeppen qysym jasaýdyń máni joq. Sonymen qatar Qazaqstan 1992 jyldan beri Chıkago konventsııasynyń múshesi. Soǵan sáıkes avıatsııalyq zertteýler júrgizý týraly kez kelgen sheshimdi tergeýdi júzege asyratyn memleket qabyldaıdy. ıAǵnı, kimdi tartý kerek, kimmen jumys isteý kerek jáne t.b. kez kelgen sheshimdi biz ǵana qabyldaı alamyz. Qoǵamda bireý bireýge qysym jasaıdy degen suraq týyndamaýy úshin biz óz betinshe sheshim qabyldaımyz, - dedi Premer-Mınıstrdiń orynbasary.

Eske sala keteıik, Aqtaý mańynda Bakýden Groznyıǵa baǵyt alǵan ushaq apatqa ushyrady.

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty.

Memleket basshysy Qasym-Jomart Toqaevtyń tóraǵalyǵymen Aqtaý qalasy mańyndaǵy ushaq apatyna baılanysty keńes ótti.

Basqosýda Memleket basshysy Úkimettik komıssııaǵa zardap shekken shetel azamattaryna qajetti medıtsınalyq jáne psıhologııalyq turǵydan tolyq kómek berýdi, qaıtys bolǵan Qazaqstan azamattarynyń týǵan-týystaryna aıryqsha qamqorlyq kórsetýdi tapsyrdy.