Qazaqstanǵa eńbek mıgranttarynyń deni Qytaıdan keledi – mınıstrlik

ASTANA. QazAqparat - 1 qazandaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 15 434 shetel azamaty eńbek etedi. Bul týraly QR Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat.

Sheteldikter eń kóp jumys isteıtin sala – qurylys, onda 6 137 adam (40%) eńbek etedi. Odan keıngi oryndarda taý-ken ónerkásibi jáne karerlerdi qazý – 1 515 adam (10%); aýyl, orman jáne balyq sharýashylyǵy – 1 211 adam (8%); kásibı, ǵylymı jáne tehnıkalyq qyzmet – 1 143 adam (8% ); óńdeý ónerkásibi – 1 071 adam (7%).

Eńbek mıgranttary keletin negizgi elder: Qytaı – 3 539 adam, Úndistan – 1 801 adam, Túrkııa – 1 707 adam, Ózbekstan – 1 487 adam, Ulybrıtanııa – 1 125 adam.

Qazirgi ýaqytta Qazaqstanda sheteldikterdiń kúshi men bilimin paıdalanatyn 1 751 jumys berýshi bar. Olarda Qazaqstannyń 399 myńnan astam azamaty jumys isteıdi, bul qyzmetkerlerdiń jalpy sanynyń 96%.

Shetel jumys kúshin tartýǵa ruqsattardyń arasynda mynadaı sanattar bar:

- basshylar men olardyń orynbasarlary úshin 586 ruqsat (birinshi sanat);

- qurylymdyq bólimshelerdiń basshylary úshin 3 076 ruqsat (ekinshi sanat).

Maýsymdyq jumystarǵa 1 380 adam, al korporatıvtik aýystyrý aıasynda 1 591 adam tartylǵan.

Aıta keteıik, QR Eńbek jáne halyqty áleýmettik qorǵaý mınıstrligi respýblıkaǵa shetel mamandaryn tartýǵa jyl saıyn kvota belgileıdi jáne bóledi. Osy jyldyń qańtar aıynda mınıstrlik josparlanǵan 28 352 kvotanyń ornyna 21 097 kvota belgiledi.