Qazaqstanǵa elektr kólikterin ákelý úshin jeke tulǵalarǵa beriletin kvotalar toqtatyldy
ASTANA. KAZINFORM — Kedendik baj ben salyqtan bosatatyn jeńildikti alyp tastaý týraly sheshimdi Eýrazııalyq ekonomıkalyq komıssııa qabyldaǵan. Bul jóninde QR QM Memlekettik kirister komıteti Saýdalyq emes aınalym basqarmasynyń bas sarapshysy Medet Medelbaı málimdedi.
Brıfıng barysynda ol aldymen sońǵy birneshe jylda bólingen kvotalar jóninde aıtty.
Sarapshynyń sózinshe, 2022 jyly 10 000 kólik quralyna, al 2023-2025 jyldar aralyǵynda ár jylǵa 15 000 kólik quralyna kvota bólingen. Jeke tulǵalar jylyna bir ret elektrli mashınany kedendik baj jáne salyq tólemeı, elge alyp kire alǵan.
Degenmen, bıyldan bastap mundaı jeńildik alynyp tastaldy. Endi Qazaqstanǵa elektr kóligin ımporttaǵan jeke tulǵalar kedendik baj ben salyq tóleýi tıis. M. Medelbaı kedendik rásimdeýdiń úsh tásilin usynady.
— Birinshisi — taýarlar deklaratsııasy boıynsha rásimdeý. Qazaqstan Respýblıkasynyń DSU aldyndaǵy mindettemeleri sheńberinde qoldanylatyn stavkalarǵa sáıkes, kedendik baj 6 AEK, al qosylǵan qun salyǵy (QQS) 16% mólsherinde. Aıta keteıik, DSU mindettemeleri boıynsha, tómendetilgen kedendik baj stavkalary qoldanylǵan taýarlar EAEO-nyń basqa memleketterine shyǵarylmaıdy jáne tek QR aýmaǵynda satylýyna ruqsat etiledi, — dedi maman.
Ekinshi jol da taýar deklaratsııasy boıynsha rásimdeýge jatady. Biraq EAEO Birikken kedendik tarıfi boıynsha júzege asady. Onda kedendik baj 6 AEK mólsherinde, ákelý kedendik salyǵy — kedendik qunynyń 15%-y jáne qosylǵan qun salyǵy — 16%.
— Úshinshi tásil — jolaýshy kedendik deklaratsııasy (JKD) boıynsha rásimdeý. Bul jaǵdaıda kóliktiń kedendik qunynyń 31%-y birjolǵy kedendik tólem retinde tólenedi, — dedi M. Medelbaı.
Sondaı-aq, ol jeke tulǵalar Qazaqstanǵa elektr kólikti bir jylda bir ret ákele alatynyn atap ótti.
Eske salaıyq, buǵan deıin Qazaqstan avtonaryǵynda elektr kólikterdiń úlesi qandaı ekeni jóninde jazǵanbyz.
Aıta keteıik, álemde elektromobıl satylymy 2025 jyly rekordtyq 20,7 mln danaǵa jetti.