Qazaqstanǵa eksportty qoldaý jónindegi zań qajet - Májilistiń jalpy otyrysy
ASTANA. Naýryzdyń 10-y. QazAqparat /Aıdar Ospanalıev/ - Qazaqstanǵa eksportty qoldaý jónindegi zań qajet. Bul týraly búgin Parlament májilisiniń jalpy otyrysynda depýtat Murat Ábenov aıtty,
dep habarlaıdy QazAqparat.
Onyń sózine qaraǵanda, elimizden taýar eksporttaýshylardy qoldaýǵa qajetti mólsherde qarjy bólinip-aq otyr. «Biraq bul isti barynsha joǵary deńgeıde júrgizýge tıisti zańnamanyń joqtyǵy qolbaılaý bolýda. Ótken jyly atalmysh máselege baılanysty zań jobasy bizdiń qaraýymyzǵa, ıaǵnı Májiliske kelip tústi. Biraq ol sapasyz jáne qajetti talaptar tolyq qamtylmaǵan bolyp shyqty. Sodan bul qujat bizge qaıtyp oralmady. Onyń ornyna saýda qyzmetin qoldaýǵa baılanysty zań jobasy kelip tústi. Onda eksporttaýshylardy qoldaýǵa baǵyttalǵan birqatar baptar bar. Biraq biz talqylaǵan eki qujattyń ekeýi eki máseleni qamtıdy. Sondyqtan ol eksportty damytýǵa aıtarlyqtaı qoldaý kórsetedi dep aıta almaımyn», dedi depýtat.
