Qazaqstanǵa ekologııalyq qaýipti shınalar zańsyz tasymaldanǵan

ASTANA. KAZINFORM — Bıyl sáýir-maýsym aılarynda bir óńirde salmaǵy 1,5 myń tonnaǵa jýyq qoldanylǵan shınalardyń 159 zańsyz ákelý deregi tirkeldi. Bul týraly Bas kólik prokýratýrasy habarlady. 

Qazaqstannyń keden zańnamasy men Eýrazııalyq ekonomıkalyq odaqtyń normalary densaýlyq pen ekologııaǵa qaýipti taýarlardyń ákelinýin qatań retteıdi. Olardyń qataryna — tek arnaıy ruqsat bolǵan jaǵdaıda ǵana ákelýge ruqsat etiletin, qoldanylǵan avtokólik shınalary (TN SEQ kody 4012) da kiredi.

Bas kólik prokýratýrasynyń tekserýleri keıbir syrtqy ekonomıkalyq qyzmetke qatysýshylardyń bul tyıymdy aınalyp ótip, qoldanylǵan shınalardy dóńgelek dıskilerimen birge ákeletinin anyqtady.

— Bıyl sáýir-maýsym aılarynda bir óńirde salmaǵy 1,5 myń tonnaǵa jýyq qoldanylǵan shınalardyń 159 zańsyz ákelý deregi tirkeldi. Taǵy bir óńirde ótken jyldary 200 tonnadan astam osyndaı ónim ákelingen.

Mundaı shınalar qaýipti qaldyqtar retinde jikteledi, olardyń paıdalanylýy jol qozǵalysy qaýipsizdigine jáne qorshaǵan ortaǵa qaýip tóndirýi múmkin, — delingen habarlamada.

Prokýratýranyń aralasýynan keıin Memlekettik kirister komıteti baqylaýdy kúsheıtip, táýekelderdi basqarý júıesindegi sharalardy jańartty. Quqyq buzýshylyqtardy anyqtaý jumysy jalǵasyp jatyr.

Aıta ketelik mashına jasaý salasy jarty jyl ishinde 11,1% ósim kórsetti.