Qazaqstanǵa efıopııalyq kofe eksporttalýy múmkin
ASTANA. KAZINFORM — Qazaqstannyń Efıopııadaǵy elshisi Jalǵas Ádilbaev álemdik naryqqa kofe eksporttaý boıynsha Efıopııadaǵy jetekshi kompanııalardyń biri — «Hadıd Treıdıng» basshylyǵymen kezdesý ótkizdi, dep habarlaıdy SІM baspasóz qyzmeti.
Suhbat barysynda taraptar Qazaqstanǵa kofe eksportyn damytý perspektıvalary týraly pikir almasty.
Qazaqstandyq dıplomat sońǵy jyldary Qazaqstanda kofe ındýstrııasynyń belsendi damyp kele jatqanyna suhbattasýshylardyń nazaryn aýdardy. Osyǵan baılanysty sapaly kofe jetkizetin jańa seriktesterge, sonyń ishinde Efıopııadan keletin ónimderge degen suranys artyp otyr.
Sonymen qatar, elshi Qazaqstan tek kofeni tutynýshy ǵana emes, sonymen birge efıopııalyq kofeni kórshiles Ortalyq Azııa elderine, Reseı men Batys Qytaıǵa eksporttaýǵa arnalǵan habqa aınala alatynyn atap ótti.
— Qazaq dıplomaty Qazaqstan men Efıopııa arasyndaǵy saýda-ekonomıkalyq yntymaqtastyqty damytý úshin barlyq alǵysharttardyń bar ekenin aıtty. Bul, eń aldymen, eldegi turaqty saıası jaǵdaı jáne barlyq kórshiles memlekettermen beıbit ári tatý kórshilik qarym-qatynas. Oǵan qosa, ol Qazaqstannyń ishki saıası jańǵyrý men ekonomıkalyq damýdyń jańa kezeńin bastan ótkerip jatqanyn, onyń aıasynda negizgi basymdyq tsıfrlyq transformatsııaǵa jáne Qazaqstan azamattary qyzmetiniń barlyq salalaryna jasandy ıntellekt tehnologııalaryn engizýge baǵyttalǵanyn atap ótti, — delingen habarlamada.
Kelissózderdiń jalǵasynda kompanııa Bas dırektorynyń orynbasary A.Halıfa elshige kompanııanyń qyzmeti týraly aqparat berip, Qazaqstanǵa kofe eksportyn damytýǵa múddelilik tanytty.
Kezdesý sońynda Qazaqstan elshisi kompanııa ónimimen jáne halyqaralyq naryqtarǵa eksporttaý úshin sapaly kofeni irikteıtin zerthanalyq saraptama ınfraqurylymymen tanysty.
Budan buryn Efıopııa Afrıkadaǵy eń úlken gıdroelektr stantsııasyn iske qosqanyn jazdyq.