Qazaqstanǵa Ebola indetine qarsy vaktsına jasaý problemasymen aınalysý asa qajet emes - Álibek Kennet
ASTANA. QazAqparat - Otandyq ǵalymdarǵa Ebola indetine qarsy vaktsına jasaý problemasymen aınalysýdyń qajeti joq. Bul týraly búgin Astanada ótken baspasóz máslıhatynda «Ulttyq medıtsınalyq holdıng» AQ basqarma tóraǵasy Álibek Kennet málim etti.
«Vaktsına nemese dárilik preparattardy qurý úshin óte qomaqty qarjy kerek, ıaǵnı bul baǵytta ondaǵan nemese júzdegen mıllıon dollar qajettilik etedi. Elimizge bul kúrdeli problemamen aınalysý asa qajet dep oılap otyrǵanym joq. Osyndaı dertter boıynsha qorǵanys preparattaryn jasaýda qajetti qarjy somasyn AQSh, Eýropanyń elderi, Reseı tarapy ıgerýde. Sondyqtan da búgingi jaǵdaıda Qazaqstanǵa elimizdiń halqy úshin mańyzdylyǵy joǵary problemalarǵa erekshe mán bergen jón»,-dedi ol.
Onyń sózine qaraǵanda, áýejaılarda qaýipti dertterden tekserý sharalaryn júrgizgen durys.
Aıta keteıik, Dúnıejúzilik densaýlyq saqtaý uıymynyń málimetterine sáıkes, 10 qazandaǵy jaǵdaı boıynsha Ebola vırýsyn juqtyrǵan 8399 adam tirkelgen. Olardyń 4033-i qaıtys boldy.
Budan buryn habarlanǵandaı, QR Ulttyq ekonomıka mınıstrligi Tutynýshylar quqyǵyn qorǵaý komıtetiniń tóraǵasy Álıaqpar Mátishev Qazaqstanda Ebola qyzbasynyń tabıǵı oshaqtarynyń tamyr jaıýy jáne epıdemııalyq taralýy úshin eshqandaı jaǵdaılar joq ekendigin aıtqan bolatyn.
Komıtet tóraǵasynyń sózine qaraǵanda, elimizge shet elderden Ebola vırýsynyń kirip ketpeýin qamtamasyz etý úshin qajetti sanıtarlyq-epıdemııaǵa qarsy sharalar kesheni jasalǵan. Shekaralardaǵy barlyq ótkizý aýmaqtarynda sanıtarlyq-karantındik baqylaý kúsheıtilgen.
