Qazaqstanǵa Dımashty kórý úshin keldim - polshalyq Andlısha

NUR-SULTAN. QazAqparat - Dımash Qudaıbergenniń elordada sanaýly saǵattan soń bastalatyn jeke kontsertine Polshadan 20-ǵa jýyq adam kelgen, dep habarlaıdy QazAqparat tilshisi.

«Biz Polshadan Qazaqstanǵa Dımashtyń kontserti úshin keldik. Barlyǵy 20-ǵa jýyq adambyz. Óz basym Dımashtyń alǵash daýsyn estigennen bastap, oǵan jankúıer boldym. Buǵan deıin Dımashty teledıdardan ǵana kórgem, endi óz kózimmen kórem. Áserli kesh bolady degen senimdemin. Taǵy bir aıtyp ótetin jaıt, meniń Qazaqstanǵa alǵash kelýim. Kontsertke deıin qalaǵa saıahat jasap shyqtyq, qala unady», - dedi Dımashtyń polshalyq jankúıeri Andlısha Indrashka.

Aıta keteıik, dál qazir Astana Arenaǵa ánshiniń kontsertine jınalǵan halyqqa otandyq Farıda Joldasova, Raıymbek Satypaldy sekildi jas ánshiler án tartýda, al Dımashtyń qatysýymen ótetin negizgi kontsert saǵat 22:00-de bastalady.

Buǵan deıin Dımash Qudaıbergenniń kontsertine kirý úshin kórermender uzyn-sonar kezekke turyp jatqanyn habarlaǵan bolatynbyz.