Qazaqstanǵa Chery kólikteriniń alǵashqy legi keldi
NUR-SULTAN. QazAqparat - Qazaqstanda Qytaıdyń kólik salasyndaǵy kóshbasshy brendteriniń biri - Chery satylymǵa shyqty. Búginnen bastap Nur-Sultan men Almaty qalalarynda ashylǵan dılerlik ortalyqtardan premıým sanattaǵy Tiggo 4, Tiggo 7 Pro, Tiggo 8 jáne Tiggo 8 Pro krossoverlerin alýǵa bolady.
«Astana Motors» kompanııasynyń quramyna kiretin First Motor Group resmı dıstrıbıýtory aldyn ala tapsyrystar qabyldaýdy bastap ketken bolatyn. Qazirdiń ózinde elimizge 50-den asa kólik ákelingen, jeltoqsan aıynyń sońyna deıin olardyń sany 88-ge jetedi.
«Biz Chery brendiniń senimdiligine jáne Chery Automobile-men yntymaqtastyqtyń joǵary áleýetine senimdimiz. Biz úshin bul uzaq merzimdi joba, ony damytýǵa barlyq bilimimizdi, tájirıbemiz ben resýrstarymyzdy salýǵa nıettimiz», - deıdi «Astana Motors» kompanııasynyń bas dırektory Beknur Nesipbaev.
Chery Automobile – Qytaıdyń eń iri avtomobıl kontserni. 20 jyl boıy kompanııa ǵylym, tehnologııa jáne ınnovatsııaǵa ınvestıtsııa salyp keledi.
Chery Automobile komandasy onnan astam eldiń avtokólik salasyndaǵy kóshbasshy kompanııalarynda jumys istep, tájirıbe jınaqtaǵan zertteýshi men kólik jasaýshylardan quralǵan.
Chery 80-nen astam elde tanymal jáne ınnovatsııalyq ónimderi, jańasha dızaınerlik sheshimderi úshin birqatar halyqaralyq marapattarǵa ıe, sondaı-aq Qytaı avtomobıl ónerkásibiniń flagmanyna aınaldy.
Sonymen qatar reseılik naryqtaǵy eń tanymal qytaılyq avtokólik brendi, munda tutynýshylardyń brendke degen adaldyǵy joǵary.
Mysaly, 2019 -2020 jyldar aıaǵynda Chery kóligin alǵan árbir besinshi adamnyń burynǵy kóligi dál osy marka bolǵan.
2021 jyldyń qańtar-qazan aralyǵynda Chery-diń Reseıdegi satylymy 266%-ǵa ósken.
Chery International vıtse-prezıdenti Jý Shandon myrzanyń aıtýynsha Chery úshin Qazaqstan álemdik naryqtaǵy mańyzdy elderdiń biri bolyp tabylady.
«Biz búkil álem boıynsha 9,8 mıllıon tutynýshynyń senimine ıe boldyq jáne sheteldik naryqta aıtarlyqtaı tabysqa jettik. Chery kólikteri bul jetistikke Qazaqstanda da qol jetkizedi dep oılaımyn. Biz Qazaqstan halqyna Chery brendiniń eń jaqsy ónimderin usynamyz», - dedi ol.
Chery kóligin jasaýshylar sońǵy tehnologııalardy qoldanady, qaýipsizdiktiń joǵary deńgeıin, avtokólikterdiń jaılylyǵyn qamtamasyz etedi jáne olardy álemdik avtomobıl óndirýshileriniń jabdyqtarymen jabdyqtaıdy. Chery-diń modeldik legi únemi jańartylyp, jetildirilip otyrady.
18 jyl qatarynan Chery qytaılyq brendter arasynda jeńil kólik eksportynyń kóshbasshysy. 2021 jyldyń qańtar-qazan aılary aralyǵynda kompanııa 200 myńnan astam kólik eksporttaǵan, bul ótken jyldyń sáıkes kezeńimen salystyrǵanda 145,7%-ǵa artyq.
Osy jyldyń qańtar-qazan aılarynda barlyǵy 739 myń 730 avtokólik satylǵan, bul 2020 jyldyń sáıkes kezeńimen salystyrǵanda 44,3%-ǵa artyq.
Aıta keteıik, Qazaqstandaǵy barlyq jańa modelderge óndirýshiniń – 5 jyl nemese 150 myń shaqyrym kepildigi bar.
Dıstrıbıýtordyń jospary boıynsha, 2022 jyly Qazaqstanda 9 Chery dılerlik ortalyǵy, al 2023 jyly olardyń sany 17-ge deıin jetedi.
Búgingi tańda kompanııada 120-dan astam jumys orny quryldy, dılerlik jelini damytý arqyly jumys oryndarynyń sany 500-ge deıin ulǵaıady.
