Qazaqstanǵa Chehııadan kerqulandar jetkizilmek
QOSTANAI. KAZINFORM – Qostanaı oblysynyń ońtústik óńiri kerqulandardyń tarıhı mekeni. Bul jylqylardy baıyrǵy qonysyna qaıtarý úshin Qazaqstan men Chehııa mamandary birlesip jumys istep jatyr.
Eki respýblıka arasyndaǵy halyqaralyq kelisim aıasynda sırek kezdesetin osy janýardyń 40 darasy Qostanaı oblysyna (Amangeldi jáne Jangeldi aýdandary) qaıta jersindiriledi.
Alǵashqy lekpen 8 kerqulan 2024 jyldyń 4 maýsymynda «Álibı» reıntrodýktsııalaý ortalyǵyna (Amangeldi jáne Jangeldi aýdandary) jetkiziledi. Olar Arqalyq áýejaıyna Chehııadan eki áskerı ushaqpen ákelinedi.
Qostanaı oblysynyń ákimi Qumar Aqsaqalov atap ótkendeı, oblys qazirdiń ózinde Betpaqdalada aqbóken popýlıatsııasyn qalpyna keltirýde tabysqa qol jetkizdi. Endigi kezek kerqulandarǵa keldi.
«Bılik, ǵalymdar, janashyr adamdardyń birlesken kúsh-jigeriniń arqasynda kerqulandar Qostanaı oblysynyń faýnasynyń ajyramas bóligine aınalady jáne bizdi kóptegen jyldar boıy sulýlyǵymen qýantady dep senemiz», – dep atap ótti ákim.
Kerqulandardy reıntrodýktsııalaý jobasynyń bastamashysy – Qazaqstannyń bıoalýantúrlilik qaýymdastyǵy.
Buǵan deıin «Prjevalskıı jylqysy» ataýy qazaqtyń ejelgi «Kerqulan», «Kertaǵy» ataýlarymen tolyqtyrylǵan.
Mundaı sheshim QR Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń uıymdastyrýymen ótken jıynda qabyldandy.
