«Qazaqstanǵa burynǵy keńestik respýblıkalardyń Ulttyq ǵylym akademııalary úlgi bola almaıdy» - respýblıkalyq basylymdarǵa sholý
***
Keshe Almatyda Elbasy Nursultan Nazarbaevtyń qatysýymen Qazaqstan ǵalymdarynyń Táýelsizdiktiń 20 jyldyǵyna arnalǵan forýmy ótti. Osyǵan oraı el gazeti «Egemen Qazaqstanda» «Qazaqstanǵa burynǵy keńestik respýblıkalardyń Ulttyq ǵylym akademııalary úlgi bola almaıdy» degen taqyryppen kólemdi maqala jarııalandy. Basylymnyń atap ótýinshe, osy jıyn barysynda álemdik ǵylymdy damytýǵa qosqan jáne memlekettiń damý strategııasynyń ǵylymı negizin qalap, júzege asyrǵany úshin Memleket basshysyna «Ǵasyr ǵulamasy» joǵary ataǵyn bergen. Al jıyn barysynda sóz sóılegen Elbasy ǵylymı zertteýlerdi kommertsııalandyrý ómirlik qajetti tıimdi júıe ekenin basa aıta kele: «Úkimetke «Samuryq-Qazyna» ál-aýqat qorymen birlesip, 2012 jyldyń 1 aqpanyna deıin «Bıznes jáne ǵylym - 2020» Jol kartasyn ázirleýdi tapsyramyn, onda biz bıznes-qoǵamdastyqtyń ǵylymı zertteýlerge qatysýyn anyqtaımyz», - dedi.
«Egemen Qazaqstan» gazetiniń jazýynsha, Astanadaǵy «Dıplomat» qonaq úıinde Táýelsizdigimizdiń 20 jyldyǵyna oraı «Qazaqstan memlekettiliginiń qalyptasýy men damýy» atty taqyrypqa arnalǵan jýrnalıster men fototilshiler arasyndaǵy shyǵarmashylyq baıqaýdyń jeńimpazdary marapattaldy. Atalǵan is-sharaǵa Parlament Senatynyń depýtattary, zııaly qaýym ókilderi, jýrnalıstıka salasyndaǵy professor-ǵalymdar, mınıstrlikterdiń jaýapty mamandary, buqaralyq aqparat quraldarynyń ókilderi qatysty. Jıynǵa qatysýshylarǵa quttyqtaý hatyn joldaǵan Baılanys jáne aqparat mınıstri Asqar Jumaǵalıev Qazaqstannyń saıası turaqtylyǵyn, ekonomıkalyq tabystarǵa jetýin, eldiń ál-aýqatynyń aıtarlyqtaı jaqsarýyn jan-jaqty nasıhattaýda jýrnalıster qaýymynyń úlesi orasan zor ekendigin atap ótken.
***
«Qazaq eli damý qarqyny jóninen álemdegi kóshbasshylardyń «úshtigine» kirip otyr. Ernst&Young aýdıtorlyq kompanııasy Qazaqstannyń aldaǵy ýaqytta - 2011-2015 jyldar aralyǵynda da ekonomıkalyq ósim boıynsha dúnıejúzindegi alǵashqy úsh memlekettiń qatarynda bolatyndyǵyn jarııalady», dep jazady «Aıqyn» gazeti búgingi sanyndaǵy «Qazaqstan álemdegi «úshtikke» kiredi» degen taqyryptaǵy maqalasynda. Basylymnyń atap ótýinshe, mundaı málimdeme keshe Astanada ótken «Qazaqstannyń áleýmettik-ekonomıkalyq damýy: Táýelsizdikke 20 jyl jáne jańa mindetter» atty ekonomıkalyq forýmda jasaldy. Ernst&Young aýdıtorlyq kompanııasy Qarqyndy damýshy naryqtar ortalyǵynyń basshysy Alekseı Karklın-Marshe ózderiniń elimizdi «álemdik naryqtaǵy mańyzdy oıynshyǵa aınalyp kele jatqan» memleket sanaıtyndaryn jetkizgen.
***
«Qazaqstannyń Tuńǵysh Prezıdenti - Elbasyn Halyq qaharmany ataǵyna usyný Úkimet basshysy Kárim Másimovtiń seısenbidegi bastamasy bolatyn. Bul bastama kidirmesten Senatqa jetip, keshegi palatanyń otyrysynda biraýyzdan qoldaýǵa ıe boldy. Májilis tarqap, Parlamenttiń qyzmetin bir ózi atqaryp otyrǵan Senat Prezıdentke elimizdegi eń joǵarǵy ataqty berýdi qamtıtyn eki zańdy birdeı qabyldady», - dep jazady «Alash aınasy» gazeti. Bul jaıynda egjeı-tegjeıli bilgińiz kelse, «Parlament Tuńǵysh Prezıdentke Halyq Qaharmany ataǵy beretin zań qabyldady» degen taqyryptaǵy maqalaǵa nazar aýdaryńyz.
Osy basylymnyń Qazaq radıosymen birlesken jobasy aıasynda aqyn Júrsin Ermanmen aradaǵy suhbat «Aıtysty 2013 jyldan bastap ıÝNESKO qarjylandyrady degendi estip, qýanyp otyrmyz» degen taqyryppen berilgen. Tilshiniń barlyq saýaldaryna tuşymdy jaýap bergen ol: «Mende bir ǵana qorqynysh bar. Bul ár sanaly qazaqtyń júregin aýyrtatyn qorqynysh qoı dep oılaımyn. Urpaq jalǵasyp, olar keshegi ata-babalardyń dástúrin, namysyn boıyna sińirgen jańa urpaq ómirge kelip, jaqsylyqtarǵa jol ashylýy kerek. Biraq biz keńes kezindegi turalap qalǵan qalpymyzdan arylyp bolǵan joqpyz», - deıdi.
***
«Qazaqstan Premer-Mınıstri Kárim Másimov Qyrǵyzstan Prezıdenti Almazbek Atambaevtyń saltanatty ulyqtaý rásimine qatysty», - dep jazady «Kazahstanskaıa pravda» gazeti. Basylymnyń atap ótýinshe, saltanatty shara Toqtoǵul Satylǵanov atyndaǵy Ulttyq fılarmonııada ótti. Qyrǵyzstan basshysyn quttyqtaý úshin Túrkııa Prezıdenti Abdolla Gúl, Grýzııa Prezıdenti Mıhaıl Saakashvılı, sondaı-aq Tájikstannyń jáne Ázirbaıjannyń Premer-Mınıstrleri arnaıy keldi. Rásimge Qyrǵyz Respýblıkasyndaǵy dıplomatııalyq mıssııalardyń basshylary, halyqaralyq uıymdardyń ókilderi qatysty.
