Qazaqstanǵa bıyl taǵy 11,5 myń elektromobıldi jeńildikpen ákelýge bolady

ASTANA. QazAqparat – El aýmaǵyna jolaýshylar kedendik deklaratsııasy boıynsha kedendik bajdar men salyqtardy tóleýden bosatyla otyryp, 3 442 elektromobıl ákelindi. Jyl sońyna deıin taǵy 11 558 elektromobıl ákelýge múmkindik bar, dep habarlaıdy QazAqparat Memlekettik kirister komıtetiniń baspasóz qyzmetine silteme jasap.

Eýrazııalyq ekonomıkalyq komıssııa keńesiniń 2022 jylǵy 17 naýryzdaǵy №39 sheshimimen 2022 jáne 2023 jyldary elektromobılderdi bajsyz ákelý múmkindigi berilgen bolatyn. EEK sheshimine sáıkes, bıyl 15 myń elektromobıldi jeńildikpen ákelýge ruqsat berilgen.

Aıta ketsek, qazir Qyrǵyz Respýblıkasynyń bastamasy boıynsha Eýrazııalyq ekonomıkalyq komıssııa alańynda bajsyz ákelý múmkindigin 2025 jylǵa deıin uzartý týraly másele qaralyp jatyr.