Qazaqstanǵa birqatar elden karantınge jatqyzylǵan ónimder kirgizilmedi

NUR-SULTAN. QazAqparat – 2021 jylǵy 1-8 qazan aralyǵynda Agroónerkásiptik keshendegi memlekettik ınspektsııa komıtetiniń aýmaqtyq ınspektsııalary Qazaqstan aýmaǵyna Reseıden, Qyrǵyzstannan, Polshadan, Lıtvadan jáne Irannan fıtosanıtarııalyq qaýpi joǵary karantınge jatqyzylǵan ónimdi zańsyz ákelýdiń 86 áreketin toqtatty, dep habarlaıdy QazAqparat.

«Karantındik fıtosanıtarııalyq baqylaýdy júrgizý kezinde Reseı Federatsııasynan 803 tonna alma, banan, qyzanaq, kartop, qyryqqabat, burysh, qyzylsha, sábiz, bıdaı, un jáne basqa da ónimderdi fıtosanıtarııalyq sertıfıkatsyz ákelýi anyqtaldy. Qyrǵyzsnan 2,7 tonna qulpynaı, tańqýraı, qurma jáne raýshan tamyryn fıtosanıtarııalyq sertıfıkatsyz ákelgeni jáne olardyń markırovkasyz ekeni belgili boldy. Polshadan 20,3 tonna alma fıtosanıtarııalyq sertıfıkatsyz jetkizilgen. Lıtvadan 19,9 tonna keshıý jańǵaǵynyń karantınge jatqyzylǵan ónimdi ekinshi ret tekserýge usynbaǵan. Irannan 45,8 tonna alma ákelý kezinde fıtosanıtarııalyq talaptarǵa sáıkes kelmeýi anyqtaldy», - delingen QR Aýyl sharýashylyǵy mınıstrligi málimetinde.

Nátıjesinde, kináli adamdar QR ÁQBtK-niń 400-baby boıynsha ákimshilik jaýapkershilikke tartylyp, olarǵa 4,2 mln teńge somasynda ákimshilik aıyppul salyndy.

«Jyl basynan beri QR Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń aýmaqtyq ınspektsııasy ósimdikter karantıni salasynda 5 myńnan astam zań buzýshylyqty anyqtap, nátıjesinde 367,2 mln teńge somasyna ákimshilik aıyppul salyndy», - dep atalyp ótken vedomstvo habarlamasynda.