Qazaqstanǵa bir myńnan astam kınozal qajet – Gúlnár Sársenova
ALMATY. QazAqparat - Ulttyq kınony qoldaý ortalyǵynyń basshysy Gúlnár Sársenovanyń pikirinshe, Qazaqstanda otandyq kınoındýstrııa salasyn damytyp, kınozaldardy kóptep ashý qajet, dep xabarlaıdy QazAqparat tilshisi.
«Ótken jyldyń esebi boıynsha, elimizdegi 91 kınoteatrda 400-ge jýyq kınozal bar. Bul Qazaqstan úshin óte az. Biz fılmdi damytýymyz kerek. Otandyq fılmderdiń úlesin arttyrý qajet. Byltyr 350-ge jýyq fılm prokatqa shyqty, onyń 48-i - qazaqstandyq. Jalpy 70-ke jýyq týyndy túsirildi, biraq tek 48-i ǵana ekranǵa jetti», - deıdi Gúlnár Sársenova.
Onyń aıtýynsha, elimizde kınoteatrlar sanyn kóbeıtý maqsatynda arnaıy baǵdarlama jasalýda.
«Bul baǵdarlama qajet. Keıbir qalalarda, iri oblys ortalyqtarynda kınozal joq. Biz baǵdarlamany ázirlep, memleketten osy máselede ishinara kómektesýin suraımyz. Bul baǵdarlamany qoldaıtyndar bar. Otandyq fılmder kóptep kórsetilýi tıis. Baǵdarlama bıýdjeti qomaqty, desek te bizge bir myńnan astam kınozal qajet. Tipti 1500 ashsaq ta artyq etpeıdi.Sonda qazaqstandyq kınematografııanyń kiristiligi 4 ese artady», - dedi ol.
Buǵan deıin, Gúlnár Sársenova kınoteatrlarǵa avtomatandyrylǵan «biryńǵaı kınobılet» júıesiniń engiziletinin aıtqan bolatyn.
