Qazaqstanǵa bilimdi, ıntellektýaldy kadrlar óte qajet - «Bolashaq» qaýymdastyǵy keńesiniń tóraǵasy

ASTANA. 10 jeltoqsan. QazAqparat /Marlan Jıembaı/ - Qazaqstanǵa bilimdi, ıntellektýaldy kadrlar óte qajet. Bul týraly búgin elordada ótip jatqan «Bolashaq-2010: áleýetti ıgerý» atty túlekter forýmynda QR Prezıdenti Ákimshiligi basshysynyń orynbasary, «Bolashaq» qaýymdastyǵy keńesiniń tóraǵasy Baýyrjan Baıbek aıtty.

«Qazaqstanǵa bilimdi, ıntellektýaldy kadrlar óte qajet. Bizdiń ekonomıkamyzǵa, ásirese ІT-tehnologııada, nanotehnologııada, ınjınırıgte áleýetti jas mamandar jetispeıdi. Aǵymdaǵy oqý jylynda 1200-den astam túlek oqýyn bitirip, elge oralady. Bul «Bolashaq» baǵdarlamasy tarıhyndaǵy eń joǵarǵy kórsetkish bolyp tabylady. Sondyqtan da bolashaqtyqtar ındýstrııaldy-ınnovatsııalyq damý baǵdarlamasynyń iske asyrylýyna at salysyp, elimizdiń odan ári turaqty damýyna óz úlesterin qosýlary qajet», - dedi ol.

Sondaı-aq forýmnyń maqsaty joǵary oqý ornyn bitirip kelgen túlekterdiń tez arada mamandyǵy boıynsha jumysqa ornalasýyna járdemdesý ekenin basa aıtqan ol: «Al bizderdiń qazirgi ýaqyttaǵy maqsatymyz - Elbasy saıasatyn qoldap, bolashaqqa arnalǵan baǵdarlamalardyń júzege asyrylýyna kómek kórsetý, ári óz úlesimizdi qosý», - dedi.

Aıta keteıik, forým jumysyna 100-den astam memlekettik organdardyń laýazymdy qyzmetkerleri, oblys ákimderiniń údemeli ındýstrııaly-ınnovatsııalyq baǵdarlamanyń júzege asyrylýyna jaýapty orynbasarlary, 50-den astam memlekettik, jeke kompanııalardyń basshylary qatysýda. Bul óz kezeginde alqaly jıyn aıasynda uıymdastyrylatyn eńbek jármeńkesi barysynda bolashaqtyqtardyń óz mamandyqtary boıynsha jumysqa ornalasýyna múmkindik bermek.