Qazaqstanǵa bıdaı ákelýge tyıym salyndy: naryq qatysýshylary neni eskerý kerek
QOSTANAI. KAZINFORM – 2026 jylǵy 27 shildeden bastap Qazaqstan aýmaǵyna avtomobıl, temirjol jáne sý kóligimen bıdaı ımporttaýǵa ýaqytsha tyıym kúshine endi. Bul týraly Qostanaı oblysy boıynsha Memlekettik kirister departamenti málimdedi, dep habarlaıdy Kazinform agenttiginiń tilshisi.
Shekteý Aýyl sharýashylyǵy mınıstriniń 2026 jylǵy 11 shildedegi №273 buıryǵyna sáıkes engizildi. Tyıym alty aı boıy qoldanylady.
Tyıym Eýrazııalyq ekonomıkalyq odaqtyń Syrtqy ekonomıkalyq qyzmetiniń taýar nomenklatýrasy boıynsha 1001 kody bar bıdaıdy úshinshi elderden de, Eýrazııalyq ekonomıkalyq odaqqa múshe memleketterden de ákelýge qatysty.
Sonymen qatar birqatar erekshelik qarastyrylǵan.
Temirjol arqyly bıdaıdy qus fabrıkalaryna, astyq óńdeý kásiporyndaryna, lıtsenzııalanǵan elevatorlarǵa jáne «Azyq-túlik kelisimshart korporatsııasy» ulttyq kompanııasyna ákelýge ruqsat etiledi.
Alaıda qus sharýashylyǵy men astyq óńdeý kásiporyndaryna jetkizilgen astyq tek óz óndiristik qajettiligi úshin paıdalanylýy tıis. Ony ishki nemese syrtqy naryqta satýǵa bolmaıdy.
Tyıym Qazaqstan aýmaǵy arqyly temirjolmen tranzıtpen ótetin bıdaıǵa, sondaı-aq respýblıka aýmaǵy arqyly júzege asyrylatyn EAEO-ǵa múshe memleketter arasyndaǵy temirjol tasymalyna qoldanylmaıdy.
Qostanaı oblysy boıynsha Memlekettik kirister departamenti syrtqy ekonomıkalyq qyzmetke qatysýshylarǵa júk jetkizýdi josparlaý kezinde jańa shekteýlerdi eskerip, qoldanystaǵy zańnama talaptaryn saqtaýǵa keńes berdi.
Osyǵan deıin Qazaqstan bıdaı ımportyna tyıym salatyny týraly jazdyq.
