Qazaqstanǵa beıbit maqsatpen kelgen adam bul qasıetti jerden baqyt tabady - N.Kagadıı
ASTANA. QazAqparat - 2 mamyr kúni «Astana Opera» teatrynda «Elim meniń - Qazaqstan!» atty kontsert ótedi, dep habarlady teatrdyń baspasóz qyzmetinen.
Kontsert baǵdarlamasy san alýan ulttardyń mádenıetin pash etetin shyǵarmalardan turady. Onda mýzykalyq kompozıtsııalar ártúrli tilde shyrqalady. Tyńdarman nazaryna qazaqtyń halyq áni «Alqońyr», ýkraın halqynyń «Їhav kozak za Dýnaı» áni men «Gopak» bıi, P. I. Chaıkovskııdiń «Jańǵaq shaqqysh» baletindegi orys jáne qytaı bıleri usynylady.
«Janǵa jaıly da, berekeli Qazaqstanǵa beıbit maqsatpen kelip, mahabbaty men jaqsylyǵyn ákelgen árbir adam bul qasıetti jerden baqyt taýyp, barshaǵa ortaq shańyraq astynda ómir súredi, negizgi ıdeıamyz - osyny jetkizý, dedi «Astana Opera» teatrynyń rejısseri Natalıa Kagadıı.
Keshte Barseg Týmanıan, Jámılıa Jarqymbaeva, Álfııa Kárimova, Janat Shybyqpaev, Saltanat Ahmetova, Meıir Báıneshov, Beıimbet Tańaryqov, Eskendir Ábjanov, Bolat Esimhanov, Aızada Qaponova, Elena Nızamýtdınova, Roza Nurkeı, Ásem Sembına, Elena Ganja syndy teatr solısteri, sondaı-aq, «Astana Opera» teatrynyń hory, sımfonııalyq orkestri jáne balettik trýppasy óner kórsetedi. QR Eńbek sińirgen qaıratkeri Abzal Muhıtdınov dırıjerlyq etedi.
