Qazaqstanǵa basqa elderden KVI juqtyryp keletin azamattardyń sany edáýir azaıdy
«Koronavırýs juqtyrǵandardyń sany azaıyp kele jatqan óńirlerde shekteý sharalary álsin-álsin alynyp jatyr. Atap aıtqanda Shyǵys Qazaqstannyń «sary» aımaqqa ótýine baılanysty oblysishilik avtobýs jáne basqa da jolaýshylar kóligi qatynasy qalpyna keltirildi. Aptanyń qaı kúnine qaramastan ashyq azyq-túlik bazarlarynyń jumysyna ruqsat berildi. Sonymen qatar tórt oblysta oıyn-saýyq ortalyqtarynyń jumys rejımine ózgerister engizilip, olardyń demalys jáne mereke kúnderi jumys isteýine ruqsat berildi. Sonymen qatar azyq-túlik satatyn jáne satpaıtyn basqa da bazarlardyń jumysynan tyıym alynyp tastaldy. Almaty qalasynda jáne Qaraǵandy oblysynda saýda jáne halyqqa qyzmet etý nysandarynyń jumysyn qaıta bastaýǵa múmkindik berildi», - dedi baspasóz máslıhatynda QR Densaýlyq saqtaý vıtse-mınıstri – bas memlekettik sanıtarlyq dáriger Erlan Qııasov.
Vıtse-mınıstrdiń aıtýynsha, shekaradaǵy sanıtarlyq baqylaý jumysy júrgizilýde.
«9 jeltoqsanǵa deıin memlekettik shekarada tekserý barysynda 635 adamnyń koronavırýs juqtyrǵany belgili boldy. Jalpy syrttan koronavırýs juqtyryp kelgenderdiń sany azaıyp bara jatqanyn atap ótý kerek. Naqtyraq aıtqanda memlekettik shekaradan avtokólik arqyly ótkenderdiń arasynda indet juqtyrǵandardyń sany 1,5 ese, áýe jolaýshylardyń arasynda 2 ese azaıdy», - dedi ol.