Qazaqstanǵa balany qorǵaý júıesiniń ozyq tájirıbesi kerek - D. Nazarbaeva
ASTANA. QazAqparat - Búgingi kúni Qazaqstanǵa balany qorǵaý júıesiniń ozyq tájirıbesi kerek. Búgin Parlament Májilisinde «Qazaqstan Respýblıkasynyń balalar quqyǵy máseleleri jónindegi zańnamasyn jetildirýdiń qazirgi aspektileri» degen taqyrypta dóńgelek ústel bolyp ótti. Onda sóz sóılegen Palatanyń vıtse-spıkeri Darıǵa Nazarbaeva osylaı málim etti.
«Zaman aǵymynyń ózi otandyq zańnamany odan ári jetildirýdi, Qazaqstandaǵy balalardyń aman-saýlyǵyn arttyrý, árbir balanyń otbasynda jan-jaqty tárbıe alýy úshin jaǵdaı jasaý qajettigin talap etýde. Al bul úshin eń aldymen osy saladaǵy zańnamany jetildirýimiz qajet. Osyǵan oraı, bir top depýtat bastamashylyq jasap «Qazaqstan Respýblıkasynyń keıbir zańnamalyq aktilerine bala quqyǵyn qorǵaý máseleleri boıynsha ózgerister men tolyqtyrýlar engizý týraly» zań jobasyn ázirledi», - dedi D. Nazarbaeva. Onyń aıtýynsha, zań jobasynyń negizgi erejeleri anany, ákeni jáne balany qorǵaý jáne osy máseleni jetildirý irgeli konstıtýtsııalyq postýlatty iske asyrýǵa baǵyttalǵan. Osy rette vıtse-spıker jetim balalardyń, balalar úıindegi tárbıelenýshilerdiń sanyn aıtarlyqtaı qysqartýdyń ekonomıkalyq jáne quqyqtyq tetikterin jetildirý asa mańyzdy.
«Ata-anasynyń qamqorlyǵynsyz qalǵan balalardy esepke alý júıesiniń aıqyn bolmaýyna baılanysty, ókinishke qaraı, oryn alatyn balalardy satý, onyń ishinde shetelge satyp jiberý faktilerin túbirimen joıý boıynsha júıeli jumys júrgizilýi kerek. Onyń ústine balalardy asyraýǵa, qamqorshylyqqa nemese qorǵanshylyqqa, patronattyq tárbıeleýge berý kezinde jekelegen sheneýnikterdiń zańnama talaptaryn oryndamaýy úırenshikti jaǵdaı bolyp aldy. Balalarymyzdyń, ásirese jetim, ata-anasynyń qamqorlyǵynsyz qalǵan búldirshinderdiń qarapaıym quqyqtary árdaıym buzylyp otyratynyn baıqaımyz. Búgin áńgime osy problemalar týraly, sonymen qatar olardy sheshý joldary jóninde bolýǵa tıis», - dedi D. Nazarbaeva.
