Qazaqstanǵa áınekti shytynatyp keskin salý ádisin ákeldim — qyzylordalyq sýretshi
QYZYLORDA. KAZINFORM – Qyzylorda oblystyq kórkemsýret galereıasynda Qazaqstan Sýretshiler odaǵynyń múshesi Dáýletbek Toıshybaevtyń «Oıan» atty kreatıvti kórmesi ótti. Onda kópshilik nazaryna soqqyly núktelik gravıýra ádisimen oryndalǵan kartınalar usynyldy.
Sýretshi sırek kezdesetin kórkemdik tehnıkany elimizge alǵash ret ákelip otyr. Jańa keskindeme óneriniń ereksheligi – kartına áınekti balǵamen syndyrý arqyly salynady. Kórmege osyndaı ádis arqyly dúnıege kelgen 20-ǵa jýyq týyndy qoıylyp, kórermen qaýymnyń oń baǵasyn aldy.
Beıneleý óneriniń ókili negizinen túrki halyqtaryna ortaq oıshyl, jyraý, qobyzshy Qorqyt babadan bastap Qabanbaı batyr, Áıteke, Tóle jáne Qazybek bıler, Ahmet Baıtursynuly, Álıhan Bókeıhan, Jambyl Jabaev, Baýyrjan Momyshuly sııaqty ult maqtanyshtarynyń sýretin salady.
Bıyl Italııada ótken XXV qysqy Olımpıada oıyndarynda mánerlep syrǵanaýdan altyn medal ıelengen tarıhı chempıon, otandasymyz Mıhaıl Shaıdorovtyń da keskinin áınek betine túsirgen.
- Áınekke sýret salý trendi álemde úsh-tórt jyl buryn bastaldy. Al Qazaqstan boıynsha birinshi ret men qoldandym. Bul jerde balǵa qalamnyń rolin atqarady. Kózime synyǵy tımes úshin kózildirik, al daýsy qulaǵymdy aýyrtpas úshin qulaqqap taǵyp alamyn. Maǵan, ásirese, túnde tynyshtyqta jumys istegen unaıdy. Búgingi kórme – az uıyqtap, kóp jumys istegenimniń nátıjesi. Búkil kartınany bir aptanyń ishinde salyp bitirdim. Tájirıbem Ahmet Baıtursynulynyń sýretin salýdan bastaldy jáne ol sátti shyqty, - dedi Dáýletbek Toıshybaev.
Ol qylqalamnan bólek qum, kúrish arqyly sýret salady. Shegege jip tartý arqyly tanymal mýzykant, ánshi-kompozıtor, Qazaqstan jáne Reseı estradasynda ózindik ornyn qalyptastyrǵan Batyrhan Shúkenovti beıneleý arqyly tanymaldyǵy artty. Al eki jyl buryn «Kilem Art» atty kórmede syrboıylyq arýlardyń kilemdegi kartınalary qabyrǵaǵa ilindi.
Bul jolǵy tyń tehnıkada beıne shyny betine túsirilgen myńdaǵan názik soqqy arqyly qalyptasyp, jaryq pen faktýranyń úılesimi nátıjesinde birneshe kórkem obraz dúnıege kelgen. Keıipkerimiz muny ınternetten kórip úırengenin aıtty. Alaıda, eshbir sýretshi búge-shigesine deıin kórsetip, erekshe ádistiń qupııasyn asha qoımaıdy eken. Tek óziniń tynymsyz izdenisi arqyly bilimin tolyqtyrǵan. Ol úshin Qyzylordanyń shyny zaýytynan shyǵatyn ónimdi óńdep paıdalanady. Qansha kólemde shyny ketetini kartınanyń kólemine baılanysty. Al týyndynyń naryqtaǵy baǵasy 300 myń teńgeden bastalady.
- Kóp shyny ketpeýi múmkin. Biraq bul jerde másele kóz maıymdy taýysqan eńbekte, - dedi sýretshi.
Buǵan deıin biz Gonkongtaǵy Mura óneri jáne toqyma ortalyǵynda qazaqstandyq sýretshi Gúlnur Muqajanovanyń «Jan jasaýy» atty jeke kórmesi ashylǵanyn habarlaǵanbyz.
