Qazaqstanǵa áıgili Cirque du Soleil ujymy keldi
ASTANA. KAZINFORM – Tanymen Cirque du Soleil ujymy Qazaqstanǵa keldi. Olar Astana men Almaty qalalarynda ańyzǵa aınalǵan OVO shoýyn uıymdastyrmaq.
OVO shoýy 4–7 maýsym aralyǵynda Astanadaǵy Barys Arena sahnasynda ótedi. Al 11–14 maýsym kúnderi qoıylym alǵash ret Almaty qalasynda, Almaty Arena arenasynda kórsetiledi. Álemdik týr aıasynda 14 qoıylym josparlanǵan.
Uıymdastyrýshylardyń aıtýynsha, shoýdy 70 myńnan astam kórermen tamashalaýy múmkin.
Cirque du Soleil-diń 42 jyldyq tarıhynda bul kompanııanyń Qazaqstanǵa ekinshi ret kelýi. Alǵash áıgili ujym elimizde EXPO-2017 halyqaralyq kórmesi kezinde óner kórsetken bolatyn.
Qoıylymnyń halyqaralyq quramynda álemniń 25 elinen kelgen 100-den astam maman jumys isteıdi. Olardyń qatarynda Brazılııa, Kanada, Frantsııa, Qytaı, Mońǵolııa, Reseı jáne basqa da memleketterdiń ókili bar. Álemniń túkpir-túkpirinen jınalǵan mamandar kórermenderge erekshe áser syılaıtyn aýqymdy shoý ázirlep jatyr.
OVO by Cirque du Soleil shoýynyń PR-menedjeri Janı Malle elorda turǵyndarynyń qonaqjaı kóńilin joǵary baǵalady.
– Qazaqstanǵa kelgenimizge óte qýanyshtymyz. Ulttyq orkestrdiń ónerin tamashalap, jergilikti taǵamnan dám tattyq. Ásirese baýyrsaq erekshe áser qaldyrdy. Munda adamdar óte qonaqjaı ári jyly júzdi eken. Birneshe kún qalany aralap, óńirdiń mádenıetimen tanysýǵa múmkindik aldyq. Endi qazaqstandyq kórermendermen kezdesýdi asyǵa kútip júrmiz, – deıdi Janı Malle.
Aıta keteıik, Cirque du Soleil ujymy Qazaqstandaǵy gastrolderdi ótkizý úshin eki júk ushaqpen keldi, onda shamamen 200 tonna jabdyq tıelgen. Onyń ishinde alyp dekoratsııalar, sahnalyq konstrýktsııalar, jaryq pen dybys júıeleri, júzdegen kostıým jáne shoýǵa qajetti tehnıkalyq jabdyq bar.
Buǵan deıin Ulttyq ulan kontsertinde alǵash jasandy ıntellekt qoldanylǵanyn jazǵan edik.
