Qazaqstanǵa aıazdy kúnder qaıta kele jatyr
ASTANA. QazAqparat - Aldaǵy úsh kúnde Qazaqstannyń batys oblystarynda kún jylynyp, qalǵan óńirlerde aýa raıy qaıta sýytady, dep habarlaıdy QazAqparat Qazgıdrometke silteme jasap.
Orta Azııa aýdandarynan jyljyǵan tsıklon respýblıkanyń ońtústigi men ońtústik-shyǵysyna jańbyr men qar ákeledi. Soǵan baılanysty kóktaıǵaq bolyp, tuman túsedi, shyǵysta qarly boran soǵady.
Aldaǵy kúnderi aýa temperatýrasy azdap kóterilgenimen, 11 qańtarda, ásirese Qazaqstannyń shyǵys aýdandarynda kúrt tómendep, túnde mınýs 30...37 gradýsqa deıin aıaz bolady.
Respýblıkanyń soltústik jáne ortalyq oblystaryna joǵary atmosfera qysymynyń yqpaly júrip turǵandyqtan, tek keı aýdandarda ǵana qar jaýýy múmkin, al túnde aýa temperatýrasy mınýs 28...35 gradýsqa deıin tómendeıdi.
Batys oblystarda azdaǵan aıazdan keıin kún jylynyp, qar jaýady, kóktaıǵaq bolýy múmkin.
