Qazaqstanǵa avtokólik arqyly kirgen 122 adamnan koronavırýs anyqtaldy – DSM

NUR-SULTAN. QazAqparat – Qazaqstannyń memlekettik shekaralarynda sanıtarlyq-karantındik baqylaý jumystary qalaı júrgizilip jatyr? Bul suraq boıynsha Densaýlyq saqtaý mınıstrliginiń Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova málimet berdi, dep habarlaıdy QazAqparat tilshisi.

«Ózderińiz biletindeı, Bas memlekettik sanıtarııalyq dárigerdiń qaýlysyna sáıkes 6 qazannan bastap Qazaqstannyń memlekettik shekaralarynda sanıtarlyq-karantındik baqylaý jumystary kúsheıtildi. Bul – áýe men avtokólik qozǵalysy boıynsha shekteý. Osylaısha búginge deıin 73 591 azamat (qazaqstandyq jáne sheteldik azamattar) avtokólikti ótkizý beketteri arqyly ótti. Olardyń ishindegi jolaýshylar – 21 279 adam. PTR-anyqtamasy joq azamattar eki kúndik karantınge jatqyzyldy. Ondaı sanattaǵy jolaýshylardyń sany – 5967 adam boldy. Olardyń ishinde 122 adamnan koronavırýs anyqtaldy», - dedi Aıjan Esmaǵambetova OKQ-da ótken baspasóz máslıhatynda.

Komıtet basshysy sonymen qatar halyqaralyq áýe reısteri arqyly Qazaqstanǵa 34 446 jolaýshy kelgenin, olardyń ishinde PTR-anyqtamasy joq 5 925 adam karantındik statsıonarǵa jatqyzylǵanyn aıtty.

«Solardyń ishinde 19 adamnyń boıynan koronavırýs anyqtaldy. Koronavırýs juqtyrǵan azamattar Túrkııa, BAÁ, Belarýs, Reseı, Mysyr elinen kelgender», - dedi ol.