Qazaqstanǵa Avstrııadan ákelinetin sıyr etinen trenbolon gormony anyqtalǵan
ASTANA. QazAqparat - Qazaqstanǵa Avstrııadan ákelinetin sıyr etinen trenbolon gormony anyqtalǵan. Bul týraly Ortalyq kommýnıkatsııalar qyzmetindegi brıfıng barysynda QR Tutynýshylardyń quqyqtaryn qorǵaý agenttigi tóraǵasynyń orynbasary - Qazaqstannyń bas sanıtarlyq dárigeri Jandarbek Bekshın málimdedi.
Jandarbek Bekshınniń aıtýynsha, aǵymdaǵy jyly Qazaqstanda Ýkraınadan keletin irimshikterdiń sapasyzdyǵy anyqtalyp, ondaı taýarlardyń elimizdiń naryǵyna enýine tyıym salynǵan. «Budan bólek, Avstrııadan ákelinetin sıyr etinen (qara angýs eti - «Rıbaı Chernogo Angýsa» taýar belgisimen satylǵan) trenbolon gormony anyqtaldy. Jalpy, Keden odaǵy aýmaǵynda gormony bar shıki etti satýǵa, taratýǵa tyıym salynǵan. Óıtkeni ondaı etpen birge onyń quramynda antıbıotıkter júredi. Bul negizi janýarlardy tez ósiretin gormon, sondyqtan shıki etterdiń quramynda antıbıotıkter kóptep ushyrasady», - dedi ol.
Bas sanıtar dárigerdiń aıtýynsha, Qazaqstan úshin et - birinshi orynda turǵan tutyný taǵamy. Sondyqtan bundaı gormondary bar azyq-túlikter qazaqstandyq naryqta bolmaýy kerek.
Sonymen qatar búgingi kúni elimizde sanıtarlyq-epıdemologııalyq monıtorıng nátıjesinde tehnıkalyq reglamentterge saı kelmeıtin ımporttyq azyq-túlik ónimderin elimizge ákelý men satýǵa tyıym salynǵan. Atap aıtqanda, onyń ishinde Belarýs Respýblıkasynda (1 kompanııa) jáne Reseıde (4 kompanııa) óndiriletin qus eti, Ýkraına irimshikteri, Italııa, Frantsııa, Shotlandııa, Reseı, Belarýs alkogol ónimderi bar. Sondaı-aq Reseıden ákelinetin keptirilgen irimshikke, baýyrdan jasalǵan pashtetke jáne Perý júzimderine tyıym salynǵan.
