Qazaqstanǵa Aýstrııa Syrtqy ister mınıstriniń ókilderi keledi
ASTANA. QazAqparat - 6 naýryzda Aýstrııanyń Eýropa, ıntegratsııa jáne syrtqy ister mınıstriniń birinshi orynbasary Iohannes Peterlık Qazaqstanǵa saparlap keledi, dep habarlaıdy QazAqparat tilshisi.
Bul týraly QR Syrtqy ister mınıstrliginiń resmı ókili Aıbek Smadııarov Astana ótken aptalyq brıfıngte aıtty.
«Sapar sheńberinde aýstrııalyq dıplomat Syrtqy ister mınıstri Beıbit Atamqulovpen kezdesýi josparlanýda. Oǵan qosa, eki el arasyndaǵy ekijaqty saıası konsýltatsııalar ótedi. Bul saıası konsýltatsııalardyń mańyzdy tarmaǵy joǵary deńgeıdegi ózara saparlardy uıymdastyrý bolyp tabylady», - dedi Aıbek Smadııarov.
Taraptar saýda-ekonomıkalyq jáne ınvestıtsııalyq yntymaqtastyqtyń perspektıvalaryn, sondaı-aq ekijaqty jáne kópjaqty formattaǵy saıası dıalogty tereńdetýdiń jaǵdaıy men perspektıvalaryn talqylaıdy.
«Astana men Vena qazirgi álemniń ózekti máseleleri boıynsha uqsas ustanymdarǵa ıe. Aýstrııa Qazaqstandy saıası yntymaqtastyq baǵytynda mańyzdy áriptes retinde qarastyrady. ıAdrolyq qarýsyzdaný jáne taratpaý taqyryptary, óńirlik qaýipsizdik, ekonomıkalyq dıplomatııany jandandyrý máseleleri eki eldiń ortaq taqyryptary», - dedi Aıbek Smadııarov.
