Qazaqstanǵa aýdarylatyn qarjy kólemi bir jylda 30 paıyzǵa ósti
NUR-SULTAN. QazAqparat – Qazaqstanǵa aýdarylǵan aqsha aýdarymdarynyń 60 paıyzdan astamy Reseı men Ońtústik Koreıadan jiberilýde. Elimizge aýdarylǵan qarjynyń jalpy kólemi bir jylda 31 paıyzǵa ósti, dep habarlaıdy QazAqparat Ranking.kz saıtyna silteme jasap.
«2019 jylǵy qańtar-mamyrda shetelden halyqaralyq aqsha aýdarymy júıeleri arqyly baǵyttalǵan aqsha somasy 145,8 mlrd teńgeni qurap, ótken jylǵy sáıkes kezeńnen 31,2 paıyzǵa artyq boldy. Sondaı-aq, tranzaktsııalar 26,7% nemese 670,8 myńǵa deıin ósti. Halyqaralyq aqsha aýdarymy júıeleri boıynsha bir tranzaktsııanyń ortasha chegi 210 myńnan 217,4 myń teńgege deıin ósti», - delingen habarlamada.
Qazaqstan Respýblıkasyna aqsha aýdarymdaryn jibergen elder ishinde Reseı kósh bastap tur. Bul RF-ten elimizge 61,9 mlrd teńge aýdarylyp, bul kórsetkish byltyrǵa qaraǵanda 22,2 paıyzǵa artyq boldy.
Ekinshi orynda 26,2 mlrd teńgemen Ońtústik Koreıa tur. Aýdarym kólemi bir jyl burynǵy deńgeıden bir jarym esege artty.
Kósh bastap turǵan úshtiktiń sońynda Ózbekstan bar, osy elden 12,8 mıllıard teńge aýdaryldy. Bul ótken jylmen salystyrǵanda 69,2 paıyzǵa artyq.
Qazaqstan aýmaǵyna qomaqty qarajat aýdarylǵan elderdiń ishinde Qyrǵyzstan, AQSh, Germanııa, Túrkııa, Tájikstan bar.
Al aqsha aýdarý júıeleriniń ishinde aldyńǵy oryndardy «Zolotaıa Korona», «Western Union», «MoneyGram» úshtigi ózara bólisip tur.
