Qazaqstanǵa áser etetini sózsiz: Qasym-Jomart Toqaev qazirgi álemdik ahýalǵa toqtaldy

ASTANA. KAZINFORM – Memleket basshysy Qasym-Jomart Toqaev el ǵalymdarymen búgingi kezdesýinde qazirgi álemdik ahýalǵa toqtaldy.

— Kóptegen sarapshylar dúnıe júzi keıingi ondaǵan jylda bolmaǵan eń aýyr daǵdarystyń tabaldyryǵynda turǵanyn málimdedi. Alpaýyt memleketter bir-birine qarsy «tarıf maıdanyn» ashqan soń óndiris pen saýda tizbeginiń buzylǵany, naryqtardyń quldyrap, shıkizat baǵamynyń turaqsyzdana bastaǵany baıqalady. Bul barlyq elge, sonyń ishinde Qazaqstanǵa áser etetini sózsiz, — dedi Prezıdent.

Ol qazir joǵary tarıfter engizýge 90 kúndik moratorıı jarııalanǵanymen, naryqtaǵy jaǵdaı óte turaqsyz ekenin alǵa tartty.

— Sondyqtan biz osynaý ekonomıkalyq dúrbeleńniń Qazaqstan ekonomıkasyna tıgizetin saldaryn joıýmen aınalysyp jatyrmyz. Alaıda dúrligýge sebep joq ekenine senimdimin. Biz syn-qaterlerdiń bárin árdaıym ózimizdiń basym baǵyttarymyzdy basshylyqqa ala otyryp eńserip kelemiz. Syrtqy qolaısyz faktorlardyń yqpalyna qaramastan damýdyń dańǵyl jolyn jalǵastyra beremiz. Negizgi ınfraqurylymdyq jobalar men basqa da bastamalar tolyǵymen oryndalady. Keshe Úkimet pen jergilikti atqarýshy organdardyń is-qımyl josparyn shuǵyl aıaqtaýdy tapsyrdym. Bul qadam ósim qarqyny men ınvestıtsııa kólemin tómendetpeýdi kózdeıdi, — dep atap ótti Qasym-Jomart Toqaev.

Onyń sózine qaraǵanda, búginde ınvestıtsııa úshin kúres údedi.

— Sondyqtan ábjil qımyldaýǵa tıispiz. Biz barlyq syn-qaterge daıyn bolǵanymyz jón. Jumystyń bárin baıyppen ári senimdi túrde atqarý kerek. Ózderińizge belgili, daǵdarystyń da óz qaıyry bar. Ol basshylyq qyzmettegi azamattardyń iskerlik qabiletiniń bar-joǵyn aıqyndap beredi. Sondaı-aq jańa múmkindikterge jol ashady. Syrtqy ahýal túbegeıli ózgergen kezeńde ulttyq ekonomıkanyń ornyqtylyǵy men áleýmettik turaqtylyqty saqtaý úshin munyń mańyzy zor, — dedi Memleket basshysy.

Aıta keteıik, buǵan deıin Prezıdent memlekettiń ǵylymdy damytý úshin naqty sharalar qabyldap jatqanyn jetkizdi.