Qazaqstanǵa arnalǵan ınsýlınniń Ózbekstanda satylýy týraly málimet tekserilýde - Bas prokýratýra

ASTANA. QazAqparat - Qazaqstan azamattaryna arnalǵan ınsýlındi Ózbekstanǵa satý faktisi boıynsha prokýratýra tekserý júrgizip jatyr. Bul týraly Parlament Májilisinde tilshilerge Bas prokýrordyń orynbasary Andreı Lýkın málim etti, dep habarlaıdy QazAqparat.

«Bul máselede tıisti aqparatty alý úshin tıisti saýaldy joldadyq. Atalǵan fakti boıynsha taldaý júrgizilýde. Sondyqtan da bul aqparat rastalsa, onda tıisti sharalar qabyldanady», - dedi Andreı Lýkın.

Sonymen qatar ol elimizde dári-dármektiń satylymyna qatysty taqyrypqa toqtaldy.

«Dári-dármekti satýǵa qatysty birshama zań buzýshylyqtar kezdesýi múmkin, onymen ókiletti organdar aınalysady. Osy oraıda talaptardy eskermegender ákimshilik jaýapkershilikke tartylady», - dedi A. Lýkın.

Esterińizge sala keteıik, budan buryn BAQ-ta Qazaqstan azamattaryna arnalǵan ınsýlın Ózbekstanda satylyp jatqandyǵy týraly aqparat taraǵan bolatyn.