Qazaqstanǵa arnalǵan ınsýlındi Ózbekstanǵa satqandar anyqtaldy
«Ózbekstanda tabylǵan qazaqstandyq ınsýlınge qatysty tergeýge bastamashylyq jasaǵynymyzdy bilesizder. Qazirgi ýaqytta atalǵan ınsýlındi satqandar anyqtalyp, tergeý amaldary júrgizilip jatyr. Ókinishke oraı, biz ony jarııa ete almaımyz. Bizdegi aqparatqa sáıkes, quqyqqorǵaý organdary qazirdiń ózinde tergeý amaldaryn qolǵa alǵan», - dedi mınıstr Úkimet úıinde ótken baspasóz máslıhatynda.
Osy oraıda E.Birtanov atalǵan máselege baılanysty 2018 jyly jan-jaqty saraptama júrgizilgenin aıtty.
«Problemany anyqtap, ótken jyldyń kókteminde quqyqqorǵaý organdaryna berdik. Bul faktilerdi sońǵy ýaqytqa deıin quqyqqorǵaý organdarymen, Bas prokýratýramen birge tekserdik. 28 qylmystyq is qozǵaldy. Mán-jaıyn quqyqqorǵaý organdary habarlaıtyn bolady», - dedi ol.
Onyń dereginshe, qazirgi ýaqytta tekserý sharalarynyń ekinshi kezeńi bastaldy.
«Qazirgi ýaqytta narkologııalyq, psıhıatrııalyq, týberkýlezge qarsy dıspanserlerde, VICh ortalyqtarynda tekserýdiń ekinshi kezeńin júrgizip jatyrmyz. Bul qorytyndy alqa jınalysynan keıin bergen tapsyrmam. Qazirdiń ózinde tıimsiz josparlaý faktileri anyqtalyp jatyr. Munyń barlyǵyn anyqtaýǵa qyzmetterdi tsıfrlandyrý múmkindik beredi. Bul jumystardy odan ary da jalǵastyramyz», - dedi ol.
Aıta keteıik, QR Bas prokýrorynyń orynbasary Andreı Lýkın Qazaqstan azamattaryna arnalǵan ınsýlındi Ózbekstanǵa satý faktisi boıynsha prokýratýra tekserý júrgizip jatqanyn málim etken bolatyn.
QR Densaýlyq saqtaý mınıstrligi Farmatsııa komıtetiniń tóraǵasy Lıýdmıla Bıýrabekova da qazaqstandyqtarǵa arnalǵan ınsýlınniń Ózbekstanda satylyp jatqanyna baılanysty aqparatqa pikir bildirgen edi.
«Insýlınder biryńǵaı dıstrıbıýtor (SK-Farmatsııa) arqyly satyp alynyp, Qazaqstannyń tikeleı medıtsınalyq uıymdaryna kelip túsedi. Ol jerde ınsýlınder retsept retinde jazylyp, patsıentterdiń qolyna tapsyrylady. Ótken jyly biz bólshek saýda jelisinde biryńǵaı dıstrıbıýtor arqyly alynǵan osyndaı preparattardyń satylý jaǵdaılaryn anyqtaǵan bolatynbyz. Bul faktiler týraly quqyq qorǵaý organdaryna da habar berdik. Biz patsıentterdiń sol preparatty alǵanynan nemese basqa jerge (Ózbekstandaǵy dárihanalarǵa) satqanynan habarymyz joq. Bolmasa ol preparattar syzylyp tastalyp, medıtsınalyq uıymdardan alynyp ketken. Basqa organdar men prokýratýra naqty osy istiń mán-jaıyn anyqtaý ústinde», - degen edi Lıýdmıla Bıýrabekova.