Qazaqstanǵa alys shetelden qaı elderdiń azamattary jıi keledi
ASTANA. KAZINFORM – 2025 jyldyń 9 aıynyń qorytyndysy Qazaqstanǵa halyqaralyq deńgeıdegi qyzyǵýshylyqtyń ósimin kórsetti.
QR UQK Shekara qyzmetiniń málimetine júginsek, bıylǵy qańtar-qyrkúıek aralyǵynda elimizge 12,2 mıllıonnan astam sheteldik azamat kelgen. Bul kórsetkish ótken jyldyń sáıkes kezeńimen salystyrǵanda 730 myń adamǵa kóp.
TMD quramyna kirmeıtin memleketterden Qazaqstanǵa kelýshiler qatary artqany baıqalady. Olardyń sany boıynsha TOP-5 el:
QHR
9 aıda Qazaqstanǵa 693 myńnan astam Qytaı azamaty kelgen. Bul kórsetkish 2024 jyldyń sáıkes kezeńimen salystyrǵanda 42%-ǵa joǵary. Qyzyǵýshylyqtyń artýyna vızasyz rejımniń engizilýi, tikeleı áýe qatynasynyń keńeıýi jáne elimizdiń týrıstik áleýetin Qytaı naryǵynda ilgeriletý septigin tıgizdi. Qazaqstan toptyq jáne jeke saıahattar úshin de Qytaı azamattary arasynda tartymdy baǵytqa aınalýda.
Úndistan
2025 jyldyń qańtar-qyrkúıek aılarynda Qazaqstanda 113 myńǵa jýyq úndistandyq azamat boldy. Bul ótken jylǵy kórsetkishten (106 myń adam) joǵary.
Túrkııa
Bul ýaqyt aralyǵynda Qazaqstan 103 myńnan astam túrik azamatyn qabyldady. Kelýshiler qatarynyń artýyna turaqty áýe qatynasy, elder arasyndaǵy mádenı jáne iskerlik baılanystar yqpal etýde.
Germanııa
2025 jyldyń 9 aıynda Qazaqstanǵa 81 myńnan astam germanııalyq azamat keldi. Etnotýrızm, biregeı tabıǵı landshafttar jáne tarıhı-mádenı oryndar - negizgi tartymdy nysandar.
Ońtústik Koreıa
Bul elden kelýshiler sany 25%-ǵa artyp, 41,3 myń adamdy qurady. Ońtústik Koreıa azamattary Qazaqstandy jıi tańdaıdy. Oǵan tikeleı áýe reısteri, vızasyz rejım, elimizdiń tabıǵatyna, mádenıetine jáne ulttyq taǵamyna qyzyǵýshylyq ta óz áserin tıgizedi.
Aıta keteıik, Almaty Belgııadaǵy týrıstik forýmda marapatqa ıe boldy.