Qazaqstanǵa alǵash ret Dúnıejúzilik dopıngke qarsy agenttik prezıdenti keldi
ASTANA. KAZINFORM — Búgin Dúnıejúzilik dopıngke qarsy agenttiktiń (WADA) prezıdenti Vıtold Banka bastaǵan delegatsııa Astanaǵa keldi. Qonaqtardy Týrızm jáne sport mınıstri Erbol Myrzabosynov, Qazaqstannyń Ulttyq dopıngke qarsy ortalyǵynyń dırektory Maıra Baqasheva jáne mınıstrlik ókilderi qarsy aldy.
Mınıstrlik málimetinshe, sapar barysynda delegatsııa sport federatsııalarynyń, Ulttyq Olımpıada komıtetiniń ókilderimen, sportshylarmen jáne stýdenttermen kezdesý ótkizip, elordadaǵy birqatar sport nysandaryn aralaıdy.
Negizgi maqsat – Qazaqstandaǵy dopıngke qarsy saıasat máselelerin talqylaý.
Dúnıejúzilik dopıngke qarsy agenttik (WADA) — sporttaǵy dopıngke qarsy kúresti úılestiretin táýelsiz uıym. Ol Halyqaralyq Olımpıada komıtetiniń qoldaýymen qurylǵan. WADA-nyń negizgi qujaty – Dúnıejúzilik dopıngke qarsy kodeks jáne oǵan qosymsha segiz halyqaralyq standart. Agenttiktiń basty mindeti – dopıngke qarsy kúresti nasıhattaý, úılestirý jáne baqylaý.
Uıym óz qyzmetin aımaqtyq jáne ulttyq dopıngke qarsy ortalyqtar arqyly júzege asyrady jáne bul ortalyqtar Kodeks talaptaryn saqtaýǵa mindetti. Sonymen qatar WADA zerthanalardy akkredıttep, dopıng-baqylaýǵa arnalǵan ǵylymı taldaýlardyń sapaly bolýyn qamtamasyz etedi.
Aıta keteıik, Qazaqstanda dopıng qaǵıdalaryna ózgeris engizildi.