Qazaqstanǵa alǵash kelgende jońǵar boldym, endi qazaq bolǵym keledi - Mark Dakaskos
ÓSKEMEN. QazAqparat - Gollıvýd juldyzdarynan quralǵan top Shyǵys Qazaqstan týraly derekti fılm túsiretin boldy. Ol fılm álemdik telearnalarǵa arnalmaq, dep habarlaıdy QazAqparat tilshisi.
Ótken ǵasyrdyń sońynda ataǵy álemge jaıylǵan birneshe Gollıvýd juldyzy áýeli Óskemen qalasyndaǵy mádenı nysandardy aralap, «Nurtaý» demalys bazasyna barady. Odan keıin Marqakóldi kózben kórip, Qatonqaraǵaı aýdanyndaǵy Rahman qaınaryna at basyn tiremek. Bereldegi Patshalar jazyǵy, Jıdebaıdaǵy Abaı-Shákárim memorıaldy kesheni, Qońyr áýlıe úńgiri men Yrǵyzbaı mazary da Gollıvýd juldyzdarynyń nazaryna usynylmaq. Túsirilim tobyn qabyldaǵan oblys ákimi Danıal Ahmetov amerıkalyq akterlerge Altaıdyń aıazy qaıtqan kezde kelgenderin aıtty.
«Shyǵys Qazaqstan - eldiń ındýstrıaldy ortalyǵy. Biz berıllıı men tantal óniminiń álem boıynsha 25-30 paıyzyn óndiremiz. Sizder aýa raıy aıaz qaıtyp, kún jylynǵan kezde keldińizder. Bizde taý da, ózen-kól de, ný orman da, shól de bar. Sizder Shyǵys Qazaqstannyń tórt aımaǵynda bolasyzdar. Kópultty elimizdiń baı salt-dástúrimen tanysasyzdar» - dedi Danıal Ahmetov.
Óz kezeginde amerıkalyq akterler Qazaqstannan alǵan alǵashqy áserlerimen bólisti. Al qazaqtyń kıno ónerimen birshama tanys Mark Dakaskos osymen úshinshi qazaqstandyq jobaǵa qatysyp otyrǵanyn jetkizdi.
«Qazaqstanǵa alǵash kelgende jońǵar boldym. Endi qazaq bolǵym keledi. Men bul jerdiń tabıǵatyna tamsanamyn. Bul eldiń ashanasy da erekshe. Qansha tamaq ishseń de, salmaq qospaı, qaz-qalpynda júre beresiń» - dedi Mark Dakaskos.
Gollıvýdtyq delegatsııa Kýrchatov pen Rıdderde de bolyp, óńirdiń óndiristik áleýetimen tanysady. ShQO ákimi baspasóz qyzmetiniń habarlaýynsha, bul joba dúnıejúzinde qazaqstandyq brendti qalyptastyrýǵa baǵyttalǵan.
