Qazaqstanǵa AQSh-tyń Atlantıkalyq keńesiniń delegatsııasy saparmen keledi
ASTANA. Mamyrdyń 11-i. QazAqparat /Ernur Aqanbaı / - Mamyrdyń 13-14 kúnderi Qazaqstanǵa burynǵy yqpaldy senator Chak Heıgel bastaǵan AQSh-tyń Atlantıkalyq keńesiniń delegatsııasy sapar jasaıdy. Bul týraly búgin Astanadaǵy aptalyq brıfıngte QR Syrtqy ister mınıstrliginiń baspasóz hatshysy Іlııas Omarov málim etti,
dep habarlaıdy QazAqparat.
Onyń aıtýynsha, sapar aıasynda Ch. Heıgel elimizdiń basshylyǵymen kezdesýler ótkizedi. Sonymen qatar sapar aıasynda mamyrdyń 13-inde L. Gýmılev atyndaǵy Eýrazııa ulttyq ýnıversıtetinde «Eýropa men Eýrazııaǵa arnalǵan HHІ ǵasyrdaǵy Helsınkıdiń qorytyndy aktisi» atty konferentsııa ótedi. Oǵan otandyq syrtqy saıasat vedomstvosynyń, dıplomatııalyq korpýstyń ókilderi jáne Eýrazııa ulttyq ýnıversıtetiniń professor-oqytýshylar quramy men stýdentter qatysady.
«Atlantıkalyq keńes AQSh-tyń bedeldi saraptamalyq ortalyqtarynyń biri bolyp tabylady. Osy keńestiń quramyna Zbıgnev Bjezınskıı, Kolın Paýell, Genrı Kıssındjer, Kondolıza Raıs sııaqty tanymal saıası qaıratkerler kiredi», dedi ol.
