Qazaqstanǵa AQSh-tan 14 jylda 40 mlrd dollar ınvestıtsııa tartyldy
Aýqymdy shara Astana ekonomıkalyq forýmy aldynda uıymdastyrylyp otyr. Oǵan Syrtqy ister mınıstri Beıbit Atamqulov, Indýstrııa jáne ınfraqurylymdyq damý mınıstri Roman Sklıar, Densaýlyq saqtaý mınıstri Eljan Birtanov, Aýyl sharýashylyǵy mınıstri Saparhan Omarov, Tsıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev, sondaı-aq amerıkalyq kásipkerler qatysty.
Álemdegi turaqsyz ahýalǵa qaramastan amerıkalyq kompanııalar Qazaqstan naryǵyna burynǵydan da jiti nazar aýdara bastaǵan. Sońǵy jyldary otandyq naryqqa «Primus Power», «Spancrete», «Uber», «McDonalds» sekildi iri kompanııalar engenin atap ótý kerek. Bul týraly forým barysynda Beıbit Atamqulov ta atap ótti.
«Elimizdiń jańa basshylyǵy saıası jáne ekonomıkalyq baǵdardy jalǵastyrýǵa, Qazaqstannyń strategııalyq turǵyda yntymaqtas elderimen seriktestikti kúsheıtý sharalaryn iske asyrýǵa nıettenip otyr. AQSh - Qazaqstannyń basty seriktesteriniń biri. 2018 jyldyń 16 qańtarynda «Aq úıde» bizdiń eldiń basshylary kezdesip, «HHІ ǵasyrda Qazaqstan men AQSh arasynda strategııalyq yntymaqtastyqtyń aıasyn keńeıtý týraly» birlesken málimdemeni qabyldaǵan bolatyn. Sol qujat boıynsha qos tarap ózara ınvestıtsııalyq jáne saýda-ekonomıkalyq yntymaqtastyqty barynsha nyǵaıtýǵa mindettelgen», - dedi forým barysynda Beıbit Atamqulov.
Forým barysynda aıtylǵandaı, 2018 jyly AQSh-tan tartylǵan tikeleı ınvestıtsııa 5,3 mlrd AQSh dollaryna jetken. Bul kórsetkish 2017 jylmen salystyrǵanda 44,7 paıyzǵa kóp. Jalpy, 2005 jyldan beri AQSh-tan Qazaqstanǵa 40 mlrd AQSh dollarynyń tikeleı ınvestıtsııasy tartylǵan.
Qazirgi tańda Qazaqstanda amerıkalyq kapıtaly bar 524 kompanııa bar. Olardyń 141-i birlese ashylǵan. 41 kompanııa taýar óndirse, 37 kompanııa óz ónimderin basqa elderde eksporttaýda.
