Qazaqstanǵa ákelingen alǵashqy jolbarys óz betinshe ań aýlap júr
ASTANA. KAZINFORM — Qazaqstanda jolbarystardy qaıta jersindirý baǵdarlamasy aıasynda tabıǵatqa jiberilgen alǵashqy jolbarys jańa mekenine beıimdeldi. Úmit atty urǵashy jolbarys qazir óz betinshe ań aýlap, qoregin taýyp júr.
Bul týraly Ekologııa jáne tabıǵı resýrstar mınıstri Álibek Qýantyrov «Turan jolbarysyn jańǵyrtý: memleket pen bıznestiń bıoalýantúrlilikti saqtaý jolyndaǵy qyzmeti» atty baspasóz májilisinde aıtty.
Ekologııa jáne tabıǵı resýrstar mınıstrliginiń málimetinshe, Úmit «Іle-Balqash» memlekettik tabıǵı rezervatynyń aýmaǵynda tirshilik etip jatyr. Ol jabaıy qabandardy aýlap, óz betinshe qorektenýde qıyndyq kórmeıdi.
— Jolbarystardyń tabıǵatta óz betinshe tirshilik etýi úshin jabaıy tuıaqty janýarlardyń jetkilikti bolýy óte mańyzdy. Osy maqsatta rezervat aýmaǵyna 200-den astam Buqar buǵysy men 140 qulan qonystandyryldy. Jolbarystardyń qorektik qoryn kóbeıtýge baǵyttalǵan jumystar turaqty júrgizilip keledi. Úmit esimdi urǵashy jolbarys óz betinshe ań aýlap, mekendeıtin aýmaǵyn belgilep úlgerdi. Bul keıin onyń janyna atalyq jolbarysty jiberýge múmkindik berdi, — dedi Ekologııa jáne tabıǵı resýrstar mınıstri Álibek Qýantyrov.
Eske salaıyq, Úmit bıyl 31 shildede tabıǵı ortaǵa jiberilgen bolatyn. Mamandar onyń jańa mekenine qalaı beıimdelip jatqanyn baqylap otyr.
Aıta keteıik, 31 qazanda osy rezervatqa Amýr atty ekinshi jolbarys jiberildi. Tórt jastaǵy atalyq jolbarys tabıǵatqa shyǵarylar aldynda arnaıy tekserýden ótti.
Qazaqstanda jolbarystar 70 jyldan astam ýaqyt boıy jabaıy tabıǵatta kezdespegen. Olardy qaıta jersindirý baǵdarlamasy keminde 35 jylǵa josparlanǵan.
