Qazaqstanǵa 500 mln teńgeniń veıpin zańsyz ákelmek bolǵandar ustaldy
ASTANA. KAZINFORM — Qazaqstandyq shekarashylar el aýmaǵyna iri kólemde veıp ónimderin zańsyz kirgizý áreketiniń jolyn kesti.
29 maýsymda UQK Shekara qyzmetiniń Qostanaı oblysy boıynsha departamentine qarasty «Qaıraq» avtomobıl ótkizý pýnktinde júk kóligi tekserilgen.
Tekserý barysynda kólik tirkemesindegi basqa júkterdiń arasynan 27 624 dana veıp anyqtaldy.
Aldyn ala esep boıynsha, tárkilengen taýardyń quny shamamen 500 mln teńgeni quraıdy. Atalǵan derek boıynsha materıaldar protsessýaldyq sheshim qabyldaý úshin quzyrly organdarǵa jiberildi.
Aıta keteıik, Qazaqstanda shegilmeıtin temeki buıymdaryn, elektrondyq tutyný júıelerin (veıpterdi), sondaı-aq olarǵa arnalǵan hosh ıistendirgishter men suıyqtyqtardy ákelýge jáne óndirýge zańmen tyıym salynǵan.
Eske salaıyq, buǵan deıin Aqmola oblysynda 221 mln teńge tabys tapqan veıp saýdasynyń arnasy joıylǵanyn jazǵanbyz.
